Ministri Hoxha propozon Ilir Prodën si kandidat për Drejtor të Përgjithshëm të Policisë së Shtetit

Ministria e Brendshme propozon si kandidat për drejtor të Policisë së Shtetit, Ilir Prodën.

Proda është aktualisht drejtor i Policisë së Elbasanit.

Me një karrierë gati 19 vite në Policinë e Shtetit, Ilir Proda së fundmi mbante prej marsit të vitit të kaluar postin e drejtorit të policisë Elbasan. Proda ka nisur punën pranë unifromave blu në vitin 2005 fillimisht si specialist i policisë kriminale në komisariatin nr. 3. Në 2013 ai emërohet shef komisariati, detyrë të cilën e mbajti gati një vit dhe dy vite të tjera, deri në vitin 2016 shërbeu si shef i komisariatit të Bulqizës.

Në korrik të vitit 2019 pasi merr gradën kryekomisar ai emërohet zv. drejtor për hetimin e krimeve në Korçë.

Ndërsa në 2021 emërohet në po të njëjtën detyrë në policinë e Elbasanit.

Në mars të vitit 2023, pasi mori gradën drejtues, ai u emërua drejtor i policisë Elbasan.

Qeveria do të marrë vendimin për kandidaturën e Prodës në mbledhjen e ardhshme.

"Ministri i Brendshëm do t’i përcjellë Këshillit të Ministrave, si kandidat për Drejtor të Përgjithshëm të Policisë së Shtetit, z. Ilir Proda dhe vendimi i Qeverisë për këtë kandidaturë do të merret në mbledhjen e radhës", thuhet në njoftim.

Në garë morën pjesë 15 kandidatë, nga të cilët vetëm 11 morën pjesë në intervistimin e komisionit të posaçëm.

Ditën e premte 27.09.2024, Komisioni i Posaçëm i dorëzoi në bazë të ligjit Ministrit të Brendshëm listën me 5 kandidatët më të vlerësuar, paraqitur si më poshtë sipas rendit alfabetik:

-Z. Altin Mena

-Z. Ardian Çipa

-Z. Ilir Proda

- Z. Neritan Nallbati

-Z. Skënder Hita