Qori: Nuk mund të hetohen të gjithë rreth Ramës dhe ai jo

Kryetari i partisë “Lëvizja Bashkë”, Arlind Qori, i ftuar në emisionin “Të Paekspozuarit” në MCN tha se prova e zjarrit për SPAK-un do të jetë raporti me kryeministrin Rama. 

Ai shprehet se është pozitiv për hetimet ndaj oligarkëve, por kërkon që edhe Rama të përballet me drejtësinë, duke mos përdorur justifikimin se të gjithë rreth tij vjedhin. 

“Prova e zjarrit me SPAK do të jetë raporti me Ramën. A do të ketë hetim dhe akuzë për Ramën? Nuk mund të hetohen të gjithë hajdutët vërdallë Ramës dhe ai jo. Kam pozitivitetin të pres, por shpresojnë të mos dëgjojmë historitë justifikuese të Ramës, që të gjithë vjedhin rreth tij dhe ai jo.

Në dosjet e SPAK po hetohen oligarkët kryesorë të vendit, nga Kastrati, Dulaku, Ulaj, Shtufi, Geci, Gjoka, Ismailaj, Salillari, Samir Mane. Është gjë e mirë që hetohen oligarkët. Pres që edhe ndaj oligarkët të ketë akuza dhe të përfundojnë para drejtësisë.”