Dr. Edlira Rehovica, kirurge e përgjithshme dhe senologe, ka ndarë me ne një rrëfim të jetës dhe karrierës së saj, duke folur për profesionin e veçantë që ka zgjedhur.
Në një intervistë për programin e mëngjesit "Zgjohu me MCN", dr. Rehovica tregon për eksperiencën e saj në fushën e kirurgjisë dhe për sfidat që ka hasur si një grua në një profesion që shpesh konsiderohet më shumë si i rezervuar për meshkujt.
Koncepti i mjekut kirurg në opinion njihet më shumë si profesion mashkulli, por shpesh harrohet se nuk ka nevojë për forcë fizike të një burri, por për koordinim të trupit dhe dorës.
Është ende e pranishme ideja se kirurgët duhet të jenë meshkuj, shpesh të moshës së madhe, por në fakt kirurgjia është një betejë nervash dhe përqendrimi është më i rëndësishëm se forca fizike.
Kur kam filluar, është folur shumë për fuqinë e dorës dhe për një qasje klasike që e lidhnin këtë profesion vetëm me burrat. Po të bësh kirurgji, nuk ka nevojë të jesh mashkull, as nuk duhet të kesh fuqi fizike.
Ajo që kërkohet është të kesh koordinim të trurit dhe dorës, për të zbatuar atë që mendon. Kjo është arsyeja që kirurgjia më pëlqente kaq shumë, sepse është një profesion që kërkon një lloj energjie dhe adrenalina që të tërheq.
Dr. Rehovica tregon se kirurgjia ka pasur një ndikim të madh emocional te ajo, veçanërisht për shkak të natyrës së pacienteve femra që trajton në operim.
Shumica e pacientëve janë gra, dhe unë i kuptoj shumë mirë për shkak të identitetit tim si grua. Kam pasur mundësinë të hyj në 'përdorimin' e trupit të tyre, si një grua që po kalon nëpër një procedurë të tillë, siç është heqja e gjirit. Një kirurg duhet të ruajë ftohtësinë dhe objektivitetin, pavarësisht se si mund të ndihen emocionalisht ndaj pacientëve.
Shumë herë, sidomos me pacientët më të rinj, na duhet të luajmë rolin e psikologes për t'i ndihmuar ata të përballen me diagnostikën dhe procedurat. Pacientet e reja në smohë shpesh nuk janë gati emocionalisht për t'u përballur me diagnoza të tilla, dhe ne si mjekë duhet të mbështesim ato jo vetëm në aspektin shëndetësor, por edhe psikologjik.
Kur pacientët janë të rinj dhe kur mundësitë për mbijetesë janë të kufizuara, është shumë e vështirë për të gjithë ne. Ne përpiqemi të bëjmë më të mirën, por gjithsesi ndihen shumë emocionalë.
Ajo gjithashtu ndan një moment shumë të rëndësishëm të jetës së saj, si një nënë e katër djemve.
Pasi mbarova studimet, isha gjithashtu nënë e katër djemve. Kam lindur djalin e parë pak para diplomimit, dhe më pas kam pasur mundësinë të balancoj jetën si mjeke dhe si nënë.
Kjo është një sfidë, por njëkohësisht një mundësi që më ka bërë më të fortë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
