Emigracioni i paligjshëm drejt SHBA, Meksika njofton mbylljen e tunelit sekret

<p>Një tunel sekret ndërkufitar i përdorur për të kontrabanduar emigrantë mes SHBA-së dhe Meksikës do të mbyllet, kanë thënë autoritetet meksikane të kufirit. Tuneli që lidh Ciudad Juarez në Meksikë dhe El Paso në Teksas, dy qytete në dy anët e kufirit, me një gjatësi 300 metra, ishte i kamufluar nga një sistem kanalizimesh dhe u zbulua vetëm javën e kaluar - pavarësisht se sipas përllogaritjeve mund të jetë dashur të paktën një vit për t’u ndërtuar.</p> <p>Hetuesit tani po shqyrtojnë nëse zyrtarët lokalë kishin dijeni për ndërtimin e tij. Siguria është rritur në të dy anët e kufirit përpara inaugurimit të Donald Trump, i cili është zotuar të nisë dëbimet masive të emigrantëve të paligjshëm sapo të marrë detyrën. Tuneli ishte përforcuar me trarë druri për të parandaluar shembjet dhe ishte i pajisur me ndriçim dhe ajrim.</p> <p>Tuneli u zbulua më 10 janar, pasi agjentët e patrullës kufitare të SHBA hoqën një pllakë metalike që mbulonte vrimën e hyrjes në tunel dhe më pas njoftuan homologët e tyre meksikanë për ekzistencën e tij.</p> <p>Fluksi i emigrantëve nga Meksika në SHBA ka lënë në hije marrëdhëniet midis dy fqinjëve dhe u bë një çështje përcaktuese e garës për zgjedhjet presidenciale të SHBA-së në vitin 2024 që kulmoi me fitoren e Trump vitin e kaluar.</p> <p>Bastisjet për të arrestuar dhe deportuar emigrantët që jetojnë në SHBA ilegalisht mund të fillojnë që të martën - një ditë pasi Trump të kthehet zyrtarisht në Shtëpinë e Bardhë - sipas mediave amerikane.</p> <p>Nën presionin diplomatik të SHBA-së, Meksika ka kryer goditjen e saj më të madhe ndonjëherë të emigrantëve, duke transportuar me autobus dhe aeroplanë migrantë jo-meksikanë në jug të vendit, larg kufirit të SHBA-së.</p> <p>Por Trump bëri fushatë me premtimin për të mbyllur kufirin SHBA-Meksikë dhe kërcënimi i tij për të vendosur tarifa 25% u pa si një përpjekje për ta detyruar Meksikën të bënte më shumë për të ndaluar emigrantët pa dokumente që të arrinin kufirin jugor të SHBA.</p> <p>Në përgjigje, presidentja e zgjedhur rishtazi meksikane, Claudia Sheinbaum, ka thënë se do t'i kërkojë SHBA-së të ndërmarrë veprime për të ndaluar fluksin e armëve që kontrabandohen nga SHBA në Meksikë.</p>