Ushqimet tradicionale shqiptare po marrin gjithnjë e më shumë vëmendje në botë, falë emigrantëve që i kanë sjellë recetat dhe shijet e vendit në tregjet ndërkombëtare.
Në “Zgjohu me MCN” u soll historia frymëzuese e Elena Lekajt, shkodranes që sot është pronare e 10 restoranteve në Boston, ku ndër të tjera shërbehet byreku tradicional shqiptar. Historia e saj nis me arratisjen dramatike të familjes përmes Liqenit të Shkodrës në vitin 1988.
E kam nisur nga zero. Sot bëj edhe byrekun tradicional të Shkodrës.
Në vitin 1988 u arratisëm me anije, u dorëzuam në Krajë dhe kërkuam strehim politik. Prisnim vizën pa e ditur se çfarë na priste. Ishte një natë e frikshme dhe e trishtë. Unë isha vetëm 16 vjeç.
Pas qëndrimit në Jugosllavi, familja udhëtoi drejt Bostonit në vitin 1991, ku filluan nga e para.
Puna jonë e parë ishte shumë e vështirë. Babai nisi si larës pjatash, unë punova gjithkund ku munda. Hapat i kemi hedhur ngadalë.
Më pas, pasi u njoha me bashkëshortin, filluam të hapnin restorantet e para.
Nga emigrantë të sapoardhur, sot Elena dhe familja e saj drejtojnë një zinxhir prej dhjetë restorantesh.
Njerëzit na njohin për gatimet tona. Kur kemi organizuar darka shqiptare, janë afruar të shohin procesin dhe u ka pëlqyer gjithmonë.
Bëjmë mantija, pispili, byrek tradicional. Kemi punonjës të shumtë dhe ua kam mësuar vetë recetat.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
