Në zjarrin që përfshiu një kullë në Londër kanë mbetur të vdekur disa persona. Numri i viktimave nuk është konfirmuar ende, ndërsa dëshmitarë në vendngjarje thanë se kanë parë familje të kërkojnë ndihmë ndërsa përpiqeshin t’u shpëtonin flakëve që përfshinë kullën 27-katëshe.
Më shumë se 600 persona u përpoqën t’u shpëtonin flakëve pasi zjarri përfshiu ndërtesën në mes të natës. Grenfell Tower në Latimer Road, u përfshi nga një zjarr i fuqishëm në orët e para të ditës së sotme, ndërsa alarmi i zjarrit nuk ra.
Banorët e kullës u derdhën në rrugë, ndërsa shumë të tjerë qëndruan aty për të parë si digjeshin apartamentet e tyre.
Një banor tha se ka parë një person të hidhej nga kati i 15-të për të shpëtuar, ndërsa një vogëlush 5-vjeçar u shpëtua nga ekipi i zjarrfikësve.
Dany Cotton, pjesëtare e London Fire Brigade, foli për një numër viktimash, pas një incidenti të paprecedentë, që e cilësoi më të rëndin që ka parë në 29 vite karrierë.
Ambulanca e Londrës konfirmoi 50 të plagosur, të cilët janë dërguar në spital, ndërsa një banor dyshohet se ka mbetur i bllokuar në katin e 11-të të ndërtesës. / Daily Mail / G.Sokoli /
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
