Kryeministri i Kosovës Albin Kurti u ka bërë sot thirrje ndërkombëtarëve që të ndalin ndihmën për Beogradin dhe të sanksionohen ata që janë në listën e zezë të SHBA-se. Duke folur në Këshillin e Përgjithshëm të “Vetëvendosjes” Kurti theksoi se duhet rikthyer zona tokësore e sigurisë në perimetrin 5 kilometra rreth kufirit me Serbinë. Ai shtoi presidenti serb ka për qëllim ta dëmtojë tërësinë territoriale të Kosovës.
“Andaj edhe Perëndimit i bëjmë thirrje që Serbisë t’i kushtëzohen benefitet aktuale jo vetëm ato të ardhshme nga BE, Amerika e Mbretëria e Bashkuar. Duhet të sanksionohen ata që bashkëpunojnë me personat qe ndodhen në listë të zezë në Ballkan. Kjo lista e zezë me emrat e kriminelëve duhet të japë rezultate. Meqë Serbia disa herë e ka afruar ushtrinë afër kufirit, duhet rikthyer zona tokësorë e sigurisë në perimetrin 5 km rreth kufirit të Serbisë. Këtë po e keqpërdor regjimi i Aleksandër Vuçiçit që po sjell artileri përbrenda këtij rripi 5 km”.
Kurti u shpreh se veprimet e qeverisë janë të ligjshme për një shtet sovran, ndonëse janë konsideruar si të njëanshme.
“Ata që ankohen për veprimet tona unilaterale janë duke u ankuar pse e kemi shpallur pavarësinë. Sundimi i ligjit për shtetin sovran është sikurse frymëmarrja. Frymëmarrja është e njëanshme, përveç te ndihma e parë ndoshta. Por Kosova mund të ketë pasur nevoje për ndihmë të parë në pranverën e 1999, por është shtet sovran i pavarur. Sulmet që na bëjnë janë dëshmi e suksesit tonë. Përpjekja e tyre për një makinë kohore qe i kthen para vitit 1999, para 2008, a para 2021 është shprehje e karakterit revizionist të regjimit në Serbi dhe kjo gjen mbështetje te kushtetuta agresive e Serbisë. Ajo duhet të ndryshojë. Të gjitha angazhimet tona nuk janë të bazuara thjesht në vullnet të popullit e në ligj por edhe në vlerat demokratike”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
