Shkon në 122 numri i të vdekurve nga uria në Gaza/ Mes viktimave edhe dy fëmijë

Spitalet e Gazës kanë regjistruar nëntë vdekje të reja për shkak të urisë dhe kequshqyerjes gjatë 24 orëve, duke e çuar numrin e përgjithshëm të vdekjeve nga uria në 122, sipas Ministrisë së Shëndetësisë së enklavës. Mes 9 të vdekurve raportohet se ishin edhe dy fëmijë,

Gaza do të mbetet pa ushqimin e specializuar terapeutik të nevojshëm për të shpëtuar jetën e fëmijëve të kequshqyer rëndë deri në mesin e gushtit, thonë UNICEF dhe agjencitë humanitare.

Gaza po përjeton aktualisht një nga katastrofat më të këqija humanitare në historinë e saj. Me ndihmën humanitare kryesisht të bllokuar, përhapja e urisë dhe shenjat e dukshme të kequshqyerjes akute, veçanërisht midis fëmijëve dhe pacientëve, po raportohen në të gjithë territorin. Institucionet shëndetësore kanë paralajmëruar për rritje të vdekjeve nga sëmundje të parandalueshme për shkak të mungesës së ushqimit, ilaçeve dhe karburantit.

Duke refuzuar thirrjet ndërkombëtare për armëpushim, ushtria izraelite ka vrarë më shumë se 59,500 palestinezë, shumica prej tyre gra dhe fëmijë, në Rripin e Gazës që nga tetori i vitit 2023.

Në nëntorin e kaluar, Gjykata Ndërkombëtare Penale lëshoi urdhër-arreste për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.

Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavë.