Inceneratori Tiranës, Xama: Janë ngritur akuza ndaj figurave të rëndësishme nga Ministria e Mjedisit

Gazetarja Ola Xama, e ftuar në emisionin "Te Pakepozuarit" në MCN, ka folur mbi ecurinë e hetimeve të çështjes së inceneratorëve, një nga skandalet më të mëdha të kohëve të fundit në Shqipëri.  Sipas Xamës, hetimet për inceneratorët e Elbasanit dhe Fierit janë tashmë të mbyllura. Për inceneratorin e Fierit, pritet edhe shqyrtimi i çështjes në Gjykatën e Apelit dhe fillimi i vendimit nga Prokuroria e Posaçme. Ndërsa hetimet për inceneratorin e Tiranës, që janë ende në zhvillim, Xama theksoi se ky hetim ka hasur në probleme të veçanta, përfshirë një shumëllojshmëri fraksionesh, duke përfshirë akuzat ndaj individëve dhe grupeve të ndryshme.

"Siç dihet që prej fillimit të hetimit, çështja e inceneratorëve u nda në tre pjesë dhe tashmë kanë përfunduar hetimet për Inceneratorin e Elbasanit dhe Inceneratorin e Fierit. Madje, për Inceneratorin e Fierit pritet edhe shqyrtimi, nisja e dhënies së vendimit në Gjykatën e Apelit dhe e shqyrtimit të kërkesës së prokurorisë së posaçme. Për Tiranën ka afro katër vjet e gjysmë që hetimet vazhdojnë dhe ajo që ka ndodhur tek hetimi i inceneratorit të Tiranës është çështja e fraksioneve."

Një nga zhvillimet kryesore në hetimin e inceneratorit të Tiranës është ngritja e akuzave ndaj ish-deputetit të Partisë Socialiste, Alqi Bllako, si dhe ndaj disa drejtuesve të Bashkisë së Tiranës dhe anëtarëve të komisionit të dhënies me koncesion. Ky komision ka përfshirë figura të rëndësishme nga Ministria e Mjedisit.

"Kemi komunikim akuze për ish-deputetin e Partisë Socialiste, zotin Alqi Bllako. Po ashtu kemi edhe akuza të ngritura për disa drejtues të bashkisë së Tiranës, komisionin e dhënies me konçension që ka patur drejtues të rëndësishëm të Ministrisë së Mjedisit."

Gjithashtu, në verën e këtij viti, prokuroria e posaçme ka ndërmarrë veprime edhe ndaj një grupi të përbërë nga anëtarë të medias dhe punonjës të kompanisë "Integrated Energy BV SPV". Këta janë lidhur me zyrën e Klodian Zotos dhe Mirel Mërtirit. Megjithatë, deri tani, hetimet nuk kanë përfshirë individë të niveleve të larta politike, qoftë nga Bashkia e Tiranës, Ministria e Infrastrukturës dhe Mjedisit, apo qeveria.

"Spak po ashtu veproi edhe ndaj një grupi ku kishte anëtarë nga pjesa e medias, por edhe disa punonjës të kompanisë së Integrated Energy BV SPV dhe punonjës të cilët ishin të lidhur me zyrën e Klodian Zotos dhe Mirel Mërtirit. Por asnjë gjë në nivele të larta sa i takon niveleve drejtuese të politikës, qoftë në Bashkinë e Tiranës, qoftë në Ministrinë e Infrastrukturës së Mjedisit apo në qeveri."