Ukraina marrëveshje me negociatorët rusë për evakuimet nga Mariupoli

Negociatorët ukrainas dhe rusë kanë rënë dakord për një plan për të evakuuar civilët nga qyteti i rrethuar i Mariupolit në bisedimet e paqes në Stamboll, ka thënë një këshilltar i presidentit Volodymyr Zelensky.

"Delegacioni ynë ka arritur një marrëveshje në Stamboll për të siguruar evakuime," tha Oleksiy Arestovych për televizionin ukrainas.

Ai shtoi se, "Unë mendoj se sot ose ndoshta nesër do të dëgjojmë një lajm të mirë, në lidhje me evakuimin e banorëve të Mariupol".

Këtë mëngjes, zëvendëskryeministri i Ukrainës njoftoi se shtatë korridore humanitare ishin planifikuar për sot, por tha se ai nga Mariupol do të kufizohej në transportin privat.

Ndërkohë që Komiteti Ndërkombëtar i Kryqit të Kuq (KNKK) do të rinovojë sot përpjekjet e tij për të evakuuar banorët nga qyteti i shkatërruar i Mariupolit.

Dje, grupit humanitar iu desh të anulonte përpjekjet e tij të shpëtimit pasi "rregullimet dhe kushtet e pamundësuan" vazhdimin e kolonës së tyre.

Grupi kishte planifikuar të dërgonte 54 autobusë dhe shumë makina për të ndihmuar në evakuimin e mijëra njerëzve që të largoheshin nga qyteti, i cili është rrethuar nga trupat ruse dhe ka parë bombardimet më intensive.

Një zëdhënës i Kryqit të Kuq të premten tha se ata nuk kishin marrë garanci se rruga që do të ndiqnin do të ishte e sigurt, kështu që ishin tërhequr në Zaporizhzhia.

"Ata do të përpiqen përsëri të shtunën për të lehtësuar kalimin e sigurt të civilëve nga Mariupol. Por është kritike që palët të respektojnë marrëveshjet dhe të ofrojnë kushtet e nevojshme dhe garancitë e sigurisë”.

Ka pasur disa përpjekje evakuimi në muajin e kaluar, të cilat gjithashtu dështuan ose u anuluan. Ukraina e ka akuzuar Rusinë se ka sulmuar civilët që ikin në disa raste, diçka që Moska e mohon.

Rreth 160,000 njerëz mbeten të bllokuar në Mariupol, ku u mungon ushqimi, uji, ilaçet dhe energjia elektrike. Të paktën 5,000 banorë janë vrarë deri më tani në sulmet, thonë zyrtarët lokalë.