Në seancën e fundit parlamentare, 114 ligjvënës i dhanë dritën jeshile dokumentit që lidhet me rrugën e Shqipërisë drejt Bashkimit Europian, duke shënuar një nga rastet e rralla të dakordësisë së gjerë politike.
Eksperti i integrimit Genti Xhaxhiu, në një analizë për edicionin e lajmeve në “MCN TV”, e cilësoi pozitiv miratimin e kësaj rezolute, pavarësisht se, sipas tij, ajo nuk ka ndonjë peshë të madhe në përshpejtimin e procesit të negociatave.
Në fakt, rezoluta ka më tepër karakter deklarativ dhe është një dokument politik.
Është një sinjal pozitiv që Tirana i dërgon Brukselit, por në thelb nuk ka ndonjë peshë të madhe që mund të ndryshojë apo të ndikojë drejtpërdrejt në shpejtësinë e negociatave.
Megjithatë, ai theksoi se Parlamenti shqiptar është ndër të vetmit në Ballkanin Perëndimor që miraton një rezolutë me pothuajse konsensus të plotë politik.
Pavarësisht bindjeve partiake, deputetët i dhanë dritën jeshile kësaj rezolute.
Ky është një sinjal pozitiv që Tirana i dërgon Brukselit dhe një adresim i gjetjeve të raportit të fundit të Parlamentit Europian, i cili theksonte se klima politike në vend, edhe për çështjet e integrimit, është e ashpër dhe e polarizuar.
Në një farë mënyre, kjo është një tentativë e mirë e Tiranës për t’i treguar Brukselit se, të paktën për çështjet e integrimit evropian, palët politike mund të flasin të njëjtën gjuhë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
