Një ditë vonese në hetime shpëtoi nga burgu Aldi Ramën që vrau policin

Një ditë vonese në dërgimin e dosjes për gjykim, shpëtoi nga burgu 21-vjeçarin Aldi Rama i cili në shtator të vitit 2021 ekzekutoi me armë zjarri oficerin e Policisë së Lezhës nënkomisar Saimir Hoxha.

Për shkak të ngarkesës në punë si shkak i numrit të kufizuar të prokurorëve, organi i akuzës i dërgoj aktet e procedimit penal pak orë në tejkalim të aftëve për të riun i cili ishte prangosur dhe vënë nën akuzë për posedim të lëndëve narkotike, pasi ju gjetën 13 gram drogë.

Por kjo mjaftoj që Gjykata e Lezhës të veproj me shpejtësi e të liroje nga qelia Aldi Ramën, duke vendosur ndaj tij masën e sigurisë "Arrest në shtëpi", por kjo mase nuk e pengoi të lëvizte lirisht e të bëhej protagonist e një krimi të rëndë me viktimë një oficer policie.

Pas ngjarjes së rëndë u vu në lëvizje Inspektoriati i Lartë i Drejtësisë dhe pas hetimeve të kryera doli në konkluzionin se nëse do ishin ndjekur procedurat siç duhet i riu nuk do të ishte liruar nga burgu, pavarësisht se ishte kapur vetëm me 13 gram lëndë narkotike dhe për këtë çështje i kërkon Këshillit të Lartë të Prokurorisë masë disiplinore ndaj ish-drejtuesit të Prokurorisë dhe prokurorit të çështjes në fjalë.

Por vonesat në hetimin e çështjeve dhe në tejkalim të afateve në Prokurorinë e Lezhës apo insitucione të tjera të drejtësisë në vend nuk është diçka e re.

Kjo ndodh për shkak të numrit të kufizuar të prokuroreve, ku nga 10 që duhet të jenë në organike aktualisht organi i akuzës në Lezhë ka vetëm 4 prokuror, çka do të thotë se 1 prokurori i duhet të trajtojë rreth 600 çështje në vit 3-fish me shumë së çdo normë njerëzore dhe juridike.

Kjo situata ka sjell ngarkese dhe kaos në punën e këtij institucioni dhe pavarësisht kërkesave të vazhdueshme drejtuar Këshillit të Lartë të Prokurorisë për plotësim organike deri tani nuk ka patur një reagim pozitiv për ti plotësuar këto vakanca.