Një mjek izraelit në Qendrën Mjekësore Soroka i cili u zotua për besnikëri ndaj ISIS-it u arrestua nga Policia e Izraelit dhe shërbimi i sigurisë Shin Bet në një operacion të përbashkët dhe kundër tij është ngritur një aktakuzë, njoftoi policia e Izraelit të enjten.
Arrestimi u bë me dyshimin për përfshirje në aktivitete të frymëzuara nga ISIS.
Muhammad Azzam, 34 vjeç, me origjinë nga Nazareti, punon si mjek në Qendrën Mjekësore Soroka.
“Administrata e spitalit i merr akuzat shumë seriozisht dhe është e tronditur prej tyre. Rasti është duke u hetuar dhe trajtuar nga autoritetet përkatëse ligjore dhe ne kemi besim në trajtimin e çështjes nga ana e tyre,” tha Qendra Mjekësore Soroka në një deklaratë, raporton JP.
Azzam iu bashkua ISIS si anëtar dhe u zotua për besnikëri ndaj organizatës, zbuloi hetimi nga Shin Bet dhe njësia qendrore e rajonit Negev në Distriktin Jugor.
Hetimi zbuloi gjithashtu se ai kishte lexuar përmbajtje ekstreme në internet të lidhur me ISIS që nga viti 2014, sipas një deklarate të Ministrisë së Drejtësisë.
Sipas aktakuzës së ngritur nga Prokurori Hofit Kantorovich, në telefonin e mjekut u gjetën dosje të shumta mediatike, përfshirë ekzekutime, prerje kokash dhe trupa të gjymtuar, si dhe dosje të titulluara “Materialet shpërthyese” dhe “Përgatitja e helmit” me dosje si “Ricin, “Helmi i mishit të kalbur” dhe më shumë.
Pas sulmit të 7 tetorit në Izrael, Azzam vendosi t’i bashkohej ISIS-it zyrtarisht dhe u zotua për besnikëri ndaj Abu Hafs al-Hajri al-Qurashi, kalifit të ri të organizatës.
Për më tepër, pas 7 tetorit, Azzam u dërgoi miqve të tij pamjet e mizorive të 7 tetorit me një ton talljeje dhe gëzimi, sipas aktakuzës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
