Kryeministri Rama: Alvini po kthehet në shtëpi (VIDEO)

11-vjeçari shqiptar që preku zemrat e të gjithëve më në fund është larguar nga kampi i ferrit i luftëtarëve të ISIS.

Alvin Berisha, ka dalë nga kampi i refugjatëve në Siri dhe tashmë i lirë në Damask.

Mëngjesin e kësaj të enjte, Alvini është dërguar në kufirin mes Libanit dhe Sirisë. Ai pritet që të mbërrijë në kryeqytetin Beirut të Libanit përe të marrë avionin drejt Romës.

Babai i tij, Afrim Berisha konfirmoi se Alvin është larguar nga kampi Al Hol ku ndodhej i vetëm.

“Djali aktualisht ndodhet në Damask, jam duke pritur që ai të niset drejt Romës”, tha ai.

Prej katër ditësh operacioni për shpëtimin e Alvinit është kryer nga organizata “Gjysmë hëna siriane”, në bashkëpunim me Kryqin e Kuq ndërkombëtar, si dhe me insistimin e jashtëzakonshëm të autoriteteve italiane.

Kryeministri Edi Rama reagon për nxjerrjen e vogëlushit shqiptar Aklvin Berisha nga kampi Sirian.

Rama ka publikuar një foto të Alvinit me ministrin e Brendshëm Sandër Lleshaj, i cili duket se është angazhuar dhe ka shkuar vetë ta marrë vogëlushin.

“ALVINI PO KTHEHET NË SHTËPI

• Pas një jave në kufirin sirian, së bashku me një skuadër speciale të policisë sonë dhe në bashkëpunim të ngushtë me partnerët italianë, ministri ynë i brendshëm po përcjell në këtë moment Alvinin në ambasadën italiane në Beirut, prej ku vogëlushi shqiptar do të pajiset me dokumentat e nevojshme e do të fluturojë drejt babait në Romë

• Një falenderim i veçantë për kryeministrin Giuseppe Conte, i cili u angazhua personalisht në ndjekjen e operacionit për palën italiane

• Faleminderit edhe dy organizatave humanitare që u bënë pjesë jetike e këtij operacioni tejet kompleks e të rrezikshëm, pa harruar konsullin e nderit të Shqipërisë në Liban, që luajti një rol të pazëvendësueshëm

• Por për ne, përpjekja nuk mbyllet këtu, sepse fëmijë e gra nga Shqipëria vazhdojnë të jenë peng në kampin-burg prej ku arritëm të nxjerrim Alvinin...”, shkruan Rama në Facebook.