Rama: Ndërtimet jashtë normave morën jetë njerëzish, do të ashpërsojmë ligjin

Në Parlament po diskutohet projektligji për kontrollin dhe disiplinimin e ligjit të ndërtimeve.

Kryeministri Rama tha se është e domosdoshme që të shtohen penalitetet në rastet e shkeljes së standardeve të ndërtimit.

Rama solli rastet e kateve shtesë, ndërtesa të cilat u dëmtuan të parat nga tërmeti i 26 nëntorit.

“Ka qenë një betejë e imja që në Bashkinë e Tiranës, që nga përpjekja për të ndëshkuar çdo m katror të ndërtuar jashtë lejes. Shumë ndërtesa në Tiranë nuk kanë lidhje me lejet e ndërtimit. Zmadhimi i objekteve, tejkalim i lejeve të ndërtimit. Janë shembur godina që në lejen e ndërtimit janë tre kate dhe në realitet kanë shkuar 8 kate. Ato morën jetë njerëzish. Nuk mund të funksionojë dot jashtë përgjegjësisë penale ky sistem që ka sjellë gjunjëzimin e shtetit. Pas këtij ligji, ne duhet të kalojmë normat e reja në Kodin Penal që ngarkojmë me përgjegjësi të gjithë zinxhirin”, tha ai.

Rama tha se ligji do të plotësohet me masa që përmirësojnë zbatimin e tij. 

"Masat për të ardhmen nuk ndalen te ky ligj. Do të ishte i kotë ky ligj nëse nuk e plotësojmë me masat penale për të gjithë zinxhirin e ndërtimit. Kur leja e ndërtimit shkelet, shembet ose seksuestrohet. Nuk mund ta gëzojë ai që e ka ndërtuar. Sanksione edhe për ndërtimet individuale", tha ai.