Taksa 100% për mallrat serbe do të zëvendësohet me reciprocitet të plotë. Heqja e mënjehërshme e taksës ishte masa e parë që iu kërkua qeverisë “Kurti” në ditën e parë të zyrtarizimit të saj.
Ndryshimin e mënyrës së taksimit mbi mallrat që hyjnë nga Serbia e bëri të ditur sot kryetarja e Parlamentit, Vjosa Osmani.
“Siç e dini, programi i përbashkët i koalicionit qeverisës është prezantuar nga ana e kryeministrit të Kosovës në Kuvendin e Republikës së Kosovës me datën 3 shkurt dhe aty është bërë e qartë që ashtu siç kemi thënë para qytetarëve, ne besojmë që tarifa duhet të zëvendësohet me masë të reciprocitetit në raport me Serbinë”, u shpreh Osmani.
Osmani deklaroi se kusht për heqjen e tarifës është ndërprerja e fushatës që Serbia ka ndërmarrë kundër njohjeve të Kosovës.
“Për t’u larguar tarifa ashtu siç e ka thënë edhe ambasadori i SHBA-së në Berlin, i cili në të njëjtën kohë është edhe përfaqësues i presidentit Trump për dialog, ambasadori Grenell, ne pajtohemi plotësisht që për t’u larguar tarifa, Serbia duhet të ndërpresë fushatën kundër njohjeve të Kosovës”, tha Osmani.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
