Tentoi t'i vidhte çantën një turisti italian nën kërcënimin e thikës, në pranga 20-vjeçari

Një 20 vjeçar nga Durrësi ka përfunduar në prangat e policisë pasi tentoi t'i vidhte nën kërcënimin e thikës çantën një turisti italian.

Shërbimet e Komisariatit të Policisë Durrës, pas marrjes së njoftimit se një shtetas, duke përfituar nga errësira në një rrugë në lagjen nr. 13, Durrës, nën kërcënimin e thikës kishte tentuar të vidhte çantën e një turisti italian, por nuk kishte mundur t'ia merrte, pasi turisti ishte larguar me automjetin e tij, organizuan punën për identifikimin dhe kapjen e autorit të dyshuar.

Bazuar në rezultatet e hetimit dhe në provat e siguruara, u bë i mundur identifikimi dhe arrestimi i autorit të dyshuar, shtetasit Amarildo Dani, 20 vjeç, banues në Bulqizë dhe rezident në Itali.

Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.