Tërmeti/ Emiratet, 100 milionë dollarë për Turqinë dhe Sirinë  

Emiratet e Bashkuara Arabe premtuan të martën 100 milionë dollarë për Sirinë dhe Turqinë, një nga shumat më të mëdha të akorduara në formë ndihme pas tërmetit shkatërrimtar që vrau më shumë se 5 400 njerëz në të dy vendet.

Vendi i Gjirit i pasur me naftë, i cili tashmë kishte premtuar rreth 13.6 milionë dollarë për Sirinë, po kryeson përpjekjet rajonale të ndihmës, duke dërguar avionë në të dy vendet me mjete ndihme dhe ekipe shpëtimi pas tërmetit me magnitudë 7.8 që goditi herët të hënën.

Të martën, presidenti i Emirateve Sheikh Mohamed bin Zayed Al-Nahyan "urdhëroi sigurimin e 100 milionë dollarëve për lehtësimin e të prekurve", tha agjencia zyrtare e lajmeve WAM.

Sipas agjencisë së lajmeve, shuma do të ndahet në mënyrë të barabartë midis Sirisë dhe Turqisë, ku secila do të marrë 50 milionë dollarë. Megjithatë, mbetet ende e paqartë nëse fondet për Sirinë përfshijnë 13.6 milionë dollarë të shpallura më parë.

Gjeneralmajor Saleh al-Ameri, komandant i operacioneve të përbashkëta në ministrinë e mbrojtjes të Emirateve të Bashkuara Arabe, tha të martën se tre avionë ushtarakë ishin dërguar në Turqi, duke transportuar ekipe kërkimi dhe shpëtimi që kanë filluar operacionet.

Gjithsej shtatë fluturime janë planifikuar për në vendet e goditura nga tërmeti, duke përfshirë dy për në kryeqytetin sirian Damask.

Agjencia zyrtare e lajmeve e Sirisë SANA tha të martën se një aeroplan i Emirateve që transportonte 10 tonë furnizime ushqimore kishte mbërritur në aeroportin ndërkombëtar të Damaskut.

Emiratet e Bashkuara Arabe rihapën ambasadën në kryeqytetin sirian në dhjetor 2018, duke sugjeruar një përpjekje për të rikthyer regjimin e presidentit sirian Bashar al-Assad në krahun arab pas vitesh bojkoti.

Në mars të vitit të kaluar, Assad bëri një vizitë në Emiratet e Bashkuara Arabe -- e para e tij në një shtet arab në më shumë se një dekadë të luftës brutale civile.