Ish-deputeti i LSI-së për zonën e Gjirokastrës, Vangjel Tavo, thotë se nga ndërtimi i aksit Kardhiq-Delvinë, për të cilin nisën sot punimet, do të ketë impakt në zhvillimin e zonës. Në një intervistë me studion e lajmeve në TvT, Tavo tha se zona që përfiton drejtpërdrejt do të jetë ajo e ish-komunës së Cepos. Megjithatë, sipas Tavos, ky investim duhej të kishte përfunduar prej vitesh.
“Aksi Kardhiq-Delvinë ka nisur që me qeverinë “Berisha”. Janë dashur tetë vjet për të vazhduar punimet. Nuk e dimë kur do të mbarojë realisht. Është një investim që duhej të kishte përfunduar prej vitesh. Ka impakt në zhvillimin e zonës, sidomos në ish-komunën e Cepës. Nuk do të thosha se ka impakt për qytetin e Gjirokastrës, pasi duke qenë se po bëhet para hyrjes në qytet, e kthen atë në një xhep. Megjithatë, ndihmon qytetarët e Gjirokastrës të mbërrijnë më shpejt në Sarandë. Impakti është më i prekshëm për ish-komunën e Cepos dhe Sarandën, por edhe për qytetarët e gjithë Shqipërisë që udhëtojnë për pushime drejt Sarandës”, tha ai.
Sa u përket investimeve të tjera të mëdha të premtuara në rajonin e Jugut, Tavo tha se deri tani janë vetëm projekte 3D, që harrohen sa kalojnë zgjedhjet.
“Nuk ka pasur asnjë diskutim dhe konsultim me banorët e zonës, as me ekspertë të rajonit të Jugut. Ka një vendimmarrje. Këto janë projekte tredimensionale të qeverisë që Rilindjes, e cila bën premtime por i fut në sirtar sapo kalojnë zgjedhjet. Pavarësisht se janë deklaruar se do të ndërtohet aeroporti i Vlorës, që e dimë si është, aeroporti i Sarandës dhe ai i Gjirokastrës. Ne do të këmbëngulim te ky i fundit si me këtë qeveri, edhe me atë që do të vijë vitin tjetër”, tha ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
