Meksikë, gjenden 381 trupa të braktisur në një krematorium privat

Hetuesit kanë gjetur 381 trupa të grumbulluar dhe të braktisur në një krematorium privat në Ciudad Juarez, në veri të Meksikës.

Zyra e prokurorit e njoftoi një vendim të tillë, duke denoncuar neglizhencën nga ana e shtëpisë funerale. 

“381 trupat u vendosën në mënyrë të parregullt në krematorium”, tha për AFP-në Eloy Garcia, zëdhënës i zyrës së prokurorit në shtetin e Chihuahua, ku ndodhet Ciudad Juarez.

Sipas zyrtarit, trupat u grumbulluan pa asnjë rregull në zona të ndryshme të ndërtesës ku vepron krematoriumi. 

“Ato u hodhën pa dallim, njëri mbi tjetrin, në dysheme”, përshkroi Garcia. Ai shtoi se të gjithë trupat ishin balsamosur dhe të shoqëruar me një certifikatë vdekjeje.

Hipoteza e prokurorit është se shumica dërrmuese e këtyre trupave u mbajtën nën mbikëqyrje dhe më pas u transferuan në krematorium për kremim. Autoritetet besojnë se disa mbetje mund të jenë braktisur për më shumë se dy vjet. 

Eloy Garcia më pas përmendi papërgjegjësinë e pronarëve të krematoriumit si një nga shpjegimet e para për këtë zbulim. Një nga administratorët e krematoriumit është paraqitur para zyrës së prokurorit. 

Prokurori dëshiron të përcaktojë përgjegjësinë penale të atyre që janë përgjegjës, tha zëdhënësi i tij. Autoritetet nuk kanë specifikuar nëse të ndjerit ishin viktima të dhunës kriminale.

Meksika, një vend i goditur rëndë nga krimi i organizuar, ka përjetuar një krizë në sistemin e saj mjeko-ligjor për vite me radhë, i mbingarkuar nga numri i lartë i trupave që duhen ekzaminuar, mungesa e stafit dhe kufizimet buxhetore.