Shërbimi E-albania u promovua si një platformë për të shmangur radhët e gjata të qytetarëve në dyert e institucioneve.
Me urdhër të kryeministrit, në platformën e shërbimeve online u përfshinë edhe certefikatat, një revolucion që nuk u prit mirë në zyrat e gjëndjeve civile.
Por nëse zyrat e gjendjeve civile ishin të detyruara të zbatonin urdhrin e kryeministrit dhe të mbyllnin sportelet, qytetarët mbetën pa shërbim. Një pjesë e tyre u sorollatën para makinerisë robot, të cilës as nuk mund t’i afroheshin. Disa të tjerë nuk e njohin shërbimin E-albania.
Marrja e shërbimeve online dhe dhënia e aksesit për qytetarët u pa me një skepticizëm nga këta të fundit. Marrja e certifikatave online solli një mëdyshje tjetër për qytetarët. Të gjitha dokumentat e lëshuara elektronikisht u bënë detyruese nga qeveria për të gjitha institucionet publike, por në asnjë rast për ato private.
Certifikatat e shkarkuara nga portali E-albania nuk njihen nga zyrat noteriale dhe ato bankare.
Noterët jashtë kameras thonë se pavarësisht se kana akses të hyjnë në regjistrin e gjendjes civile, disa të dhëna nuk mund t’i marrin on-line. Drejtoria e Përgjithshme e Gjendjes Civile ka dhënë akses vetëm për regjistrat pas vitit 2008-të.
Të tillë shqetësim shfaqin edhe bankat, të cilat si institucione private nuk e kanë obliguese njohjen e certifikatës online.
Të kontaktuar nga Tema TV, Banka Kombëtare Tregtare duke ju përgjigjur interesit të tv tonë për mosnjohjen e certefikatave të lëshuara elektronikisht, bazuar mbi legjislacionin elektronik, të ndryshuar thekson se
“Pranimi i certifikatave online është një detyrim vetëm për subjektet publike dhe jo ato private. BKT mirepret zhvillimet e ardhshme për mundësinë e verifikimit të plotë të vërtetësisë të çertifikatave online”.
I kontaktuar nga Tv Tema, drejtori i Drejtorisë së përgjithshme të Gjendjes Civile, Bledar Doracaj, ka theksuar se po diskutohet për një bashkëpunim mes qeverisë dhe intitucioneve bankare, për të njohur certifikatat online.
Zyrat e Gjendjeve Civile për momentin lëshojnë certifikata vetëm për fëmijët nën moshën 16 vjeç dhe shtetasit që e kërkojnë këtë shërbim për dokumentacion jashtë vendit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
