Sezoni turistik në Durrës është vlerësuar përgjithësisht si pozitiv, ndonëse me disa kontraste dhe ndryshime të ndjeshme krahasuar me vitet e kaluara.
Sipas korrespondentes së MCN Live, Ervina Garo, qyteti bregdetar ka vazhduar të jetë një ndër destinacionet më të frekuentuara të pushimeve verore, por mungesa e dukshme e turistëve nga diaspora dhe veçanërisht nga Kosova ka ndikuar në një boshllëk të ndjeshëm në treg.
Ka një rënie prej 4–5% të numrit të turistëve nga Kosova, të cilët tradicionalisht kanë qenë ndër vizitorët më besnikë të Durrësit.
Muaji korrik rezultoi të jetë më i dobët se pritej për tur-operatorët dhe strukturat akomoduese, me një numër më të ulët rezervimesh krahasuar me të njëjtën periudhë të viteve të mëparshme.
Përkundër kësaj, pjesa e rezervimeve last minute (në minutën e fundit) dhe ofertat promovuese kanë bërë që shumë struktura të kenë sërish dhoma të lira, sidomos në prag të muajit shtator, kur normalisht ishte e vështirë të gjeje akomodim.
Edhe pse ka një rënie të lehtë në numër, interesi për Durrësin nuk është zhdukur. Shumë vizitorë e kanë përzgjedhur qytetin jo vetëm për bregdetin, por edhe për të vizituar monumentet historike dhe trashëgiminë kulturore që ofron Durrësi si një nga qytetet më të vjetra të Mesdheut.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
