Operacioni Ndërkombëtar i Monitorimit kërkon apelimin në Kolegjin e Posaçëm të Apelimit (KPA) të vendimit të Komisionit të Pavarur të Kualifikimit (KPK) që konfirmoi në detyrë kryetarin e Gjykatës Kushtetuese Bashkim Dedja.
Përmes një njoftimi, ONM ka kërkuar që të ankimohet vendimi i marrë nga organi i vettingut në KPA .
"Në datën, 13.07.2018, Operacioni Ndërkombëtar i Monitorimit, u ka paraqitur Komisionerëve Publikë rekomandimin për të ankimuar këtë vendim të Komisionit të Pavarur të Kualifikimit në Kolegjin e Posaçëm të Apelimit. Komisionerët Publikë janë duke shqyrtuar vendimin e Komisionit të Pavarur të Kualifikimit dhe rekomandimin e Operacionit Ndërkombëtar të Monitorimit. Afati i fundit për të paraqitur ankim nga Komisionerët Publikë është data 28.07.2018”, thuhet në njoftimin e ONM-së.
Ende nuk dihet arsyeja se përse ONM ka bërë këtë ankimim, i cili është dhe zyrtarisht ankimimi i parë që ndërkombëtarët bëjnë për një gjyqtar që ka kaluar me sukses procesin e vettingut.
Më 13 Korrik, Komisioni i Pavarur i Kualifikimit dha vendimin për konfirmimin në detyrë të kryetarit të Gjykatës Kushtetuese.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
