Meta: 25 prilli mund t’i shërbejë demokracisë e stabilitetit të vendit

Presidenti i Republikës Ilir Meta, ka dalë me një mesazh për qytetarët shqiptarë, duke i përgëzuar ata për qetësi dhe maturi të treguar në ditën e votimeve më 25 prill.

Ai i adresoi mesazh edhe partive politike, që të dëshmojnë maturi deri në përmbylljen e procesit të numërimit. Meta ka pranuar rezultatin e zgjedhjeve duke thënë se në shtator krijohen institucionet e reja dhe deri atëherë ka kërkuar të tregohet maturi dhe reflektim nga partitë politike.

 Kreu i Shtetit gjithashtu shtoi se sfida e tij më e madhe ishte që “Sovrani të shprehë i lirë vullnetin e tij dhe që Shqipëria të rikthehet në shinat e Kushtetutës, të parlamentarizmit dhe në normalitet politik”.

“ Të dashur qytetarë të Republikës, Më 25 Prill, ju e shprehët me votë vullnetin për të zgjedhur përfaqësuesit tuaj në Kuvendin e Shqipërisë. Në këto momente është tepër e rëndësishme, që ky proces të përmbyllet qetësisht dhe që çdo votë, nga Vermoshi në Konispol, të numërohet dhe të administrohet sipas ligjit. Deri në shpalljen e rezultatit përfundimtar, partitë politike dhe përfaqësuesit e tyre duhet të dëshmojnë maturi dhe qetësi. Sfida ime madhore, sidomos këto dy vitet e fundit, ka qenë që Sovrani të shprehë i lirë vullnetin e tij dhe që Shqipëria të rikthehet në shinat e Kushtetutës, të parlamentarizmit dhe në normalitet politik. Edhe pse i vetëm përballë të gjithë institucioneve të kapura, ja arrita, që 25 Prilli të ishte një ditë e qetë, paqësore, pa skena dhune dhe me pjesëmarrjen tuaj masive për të ushtruar të drejtën e votës. Ndonëse dukej një sfidë e pamundur jam i lumtur, që 25 Prilli mund t’i shërbejë demokracisë dhe stabilitetit të vendit. Tani është koha për të përmbyllur me qetësi dhe në respekt të ligjit procesin zgjedhor dhe më pas të gjithë të reflektojnë deri në shtator, kur krijohen institucionet e reja, që burojnë nga vota e 25 Prillit.