Pothuajse 90% e ukrainasve nuk kanë besim te Donald Trump, sipas një sondazhi të ri të publikuar për të shënuar 100 ditët e para të presidentit amerikan në detyrë.
Sondazhi, i kryer nga Info Sapiens për Qendrën e Evropës së Re (NEC) me seli në Kiev dhe i publikuar të hënën, sugjeron se 89% e ukrainasve thanë se nuk i besojnë Trump, ndërsa vetëm 7.4% thanë të kundërtën.
Një sondazh i ngjashëm në nëntor 2024, përpara se Trump të betohej për mandatin e tij të dytë, tregoi se 44.6% e ukrainasve thanë se i besonin Trumpit, krahasuar me 47.2% që nuk e besonin.
NEC ia atribuoi "rezultatin relativisht të lartë" të Trumpit në atë kohë "zhgënjimit të përgjithshëm me politikën hezituese të administratës së Joe Bidenit drejt mbështetjes së Ukrainës", si dhe premtimit të fushatës së Trumpit për të negociuar shpejt një marrëveshje paqeje midis Kievit dhe Moskës.
Besimi tek presidenti i SHBA-së ka rënë ndjeshëm në Ukrainë që atëherë, sepse strategjia e tij “ndonjëherë dukej më në përputhje me vizionin revanshist të Rusisë sesa me të drejtën ndërkombëtare”, tha NEC.
Ndërsa Trump ka kritikuar si Rusinë ashtu edhe Ukrainën, ai fajësoi udhëheqësin ukrainas Vladimir Zelensky për konfliktin. Takimi i tyre në Zyrën Ovale në shkurt u shndërrua në një përballje me tone të larta, gjatë së cilës Trump dhe zëvendëspresidenti i SHBA-së JD Vance e akuzuan Zelenskyn se ishte mosmirënjohës për ndihmën amerikane dhe se "luante me Luftën e Tretë Botërore".
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
