Milo: Politika rajonale fqinjësore e Shqipërisë ka lëvizur nga boshti i saj tradicional (VIDEO)

Ish-ministri i Jashtëm Paskal Milo tha në studion e lajmeve në MCN Tv se në procesin e integrimit Shqipëria e ka pengesën nga Greqia, Maqedonia e Veriut e ka nga Bullgaria dhe se mendimi në Bruksel është që Shqipëria dhe RMV-ja të shkojnë paralel në këtë proces.

Sipas Milos nuk ka vend për të përdorur terma euforik nga ministrat për punën e bërë në këtë proces, por duhet bërë një analizë e thellë se pse negociatat nuk u hapën.

Termi është paksa euforik për të karakterizuar punën që është bërë. Mund të përdorej një term pak më realist, por gjithsesi procesi i integrimit evropian të Shqipërisë është proces i gjatë me uljet e ngritjet e tij. Nuk është hera e parë që Shqipëria ndeshet me vështirësi që janë shkaktuar qoftë nga të tjerët, por qoftë dhe vetë ajo me politikat që ka zbatuar në Shqipëri.

Integrimi evropian i Shqipërisë është proces kompleks që nuk ka të bëjë vetëm me arritjen e parametrave, standardeve dhe plotësimin e kritereve që kërkon BE, që janë një numër në fusha të ndryshme, por ka të bëjë edhe me çështjet e respektimit të lirive dhe të drejtave të njeriut, minoriteteve.

BE i kushton vëmendje kapitujve që kanë të bëjmë me lirinë  e mediave, lirinë e të drejtat e njeriut,  minoriteteve. Është kjo arsyeja pse këto kapituj kanë prioritet dhje janë të parat që diskutohen. Duhet të kemi ndjenjën e masës dhe e përgjegjësisë kur flasim.

Është për të ardhur keq që nuk hapen negociatat. Kjo nuk është  arsye për t’u mburrur e vetëkënaqur, por të bëhet analizë kritike pse nuk u hapën, dhe nëse qëndrimi që po mban BE është qëndrim që ka arsye të mbahet, është kapriçio e një shteti anëtar apo thirrje që BE bën që secili të shohë te vetja ku jemi me zbatimin e kritereve.

Nuk është hera e parë që mjedisi ballkanik prodhon kriza, mosmarrëveshje që rëndojnë situatën e vendeve që marrin pjesë në këto grindje historike ballkanike. Ata që e paguajnë koston e këtyre veprimeve janë popujt, njerëzit e thjeshtë. Qoftë qeveritarët, qoftë dhe ata politikanë që kanë status tjetër nuk është e se e vuajnë çështjen e integrimit, e vuajnë masa e gjerë e njerëzve. Sepse sa më shpejt që Shqipëria të bëhet anëtare sa më shpejt do përfitojnë.

Fakti që nuk ka artikulime direkte për çështjen e hapjes së Konferencës së dyte qeveritare me Shqipërinë, kjo mund të çojë që të mos hapen as edhe me RMV-në.

Mendimi në Bruksel është që Shqipëria dhe RMV të shkojnë paralel në këtë proces, në hapjen  e konferencës së dytë ndërqeveritare.

Shqipëria e ka pengesën nga Greqia, Maqedonia e Veriut e ka nga Bullgaria. Duet parë si do të zhvillohet procesi orët e ardhshme, çfarë mesazhi do të japë nesër Këshilli Evropian. A do të ketë kompromis orët e fundit, gjë që do të jetë e vështirë.

Më tej, Milo tha se politika rajonale fqinjësore e Shqipërisë ka lëvizur nga boshti i saj tradicional në raport me Kosovën, Greqinë dhe atë që u quajt “Ballkani i Hapur”.

Ish-ministri tha se Greqia dhe Shqipëria po bëjnë provën e forcës.

Politika rajonale fqinjësore e Shqipërisë ka lëvizur nga boshti i saj tradicional, gjatë këtyre muajve të fundit, edhe në raport me Kosovën, dhe në raport me atë që u quajt si  “Ballkani i Hapur”, por edhe në raport me Greqinë. Kemi dy devijime në raport me politikën e mëparshme të fqinjësisë së mirë, të përpjekjeve për t’i zgjidhur mosmarrëveshjet me dialog dhe po vihet re një qëndrim këmbëngulës përtej parametrave normale të një qeverie që në politikën e jashtme ka adoptuar metoda të dialogut politik dhe jo të forcës në marrëdhëniet me vendet fqinje.

Nuk shoh vullnet, të dy palët po bëjnë provën e forcës që i ka çuar në deklarata që nuk lënë shteg për të gjetur kompromisin.