Kryebashkiaku i Korçës, Sotiraq Filo, është kundër ndërtimit të TEC-it në Korçë. Me anë të një letre drejtuar ministrit të Mjedisit, Blendi Klosi dhe ministres së Infrastrukturës dhe Energjetikës, Belinda Balluku, Filo kërkon refuzimin e kërkesës së kompanisë GPP për ndërtimin e një TEC me gaz në afërsi të qytetit të Korçës. Kryebashkiaku i Korçës e motivon qëndrimin kundër TEC-it me mungesën e garancive për eliminimin e ndotjes.
“Ju kërkoj të mos aprovoni vlerësimin e ndikimit në mjedis, pasi investitorët nuk kanë paraqitur asnjë garanci për një bilanc pozitiv të ndotjes. Projekti është shumë afër qytetit dhe në toka të frytshme bujqësore. Qëndrimi kundër i Bashkisë së Korçës ka qenë i qartë dhe konsistent që në raportin e pregatitur për KIS në dt 5.12.2017 ku Bashkia Korçë është shprehur JO me arsyetimin e afërsisë me qytetin. Ky qëndrim është mbështetur edhe nga Ministria e Bujqësisë dhe Zhvillimit Rural e cila ka theksuar se ky projekt cënon funksionalitetin e Fushës së Korçës nga fshati Barc deri në Zemblak. Në këto kushte, ju kërkoj mosaprovimin e këtij investimi, i cili në çdo rast nuk do të mund të realizohet dot në kundërshtim me vullnetin e Bashkisë së Korçës”, thuhet në letrën e kryebashkiakut Filo.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
