Një ditë pasi qeveria e Maqedonisë së Veriut pezulloi taksën progresive, kryeministri Zoran Zaev pranoi se aplikimi i saj ishte një gabim. Taksa ishte premtuar që para zgjedhjeve të 2016-s, por për qeverinë Zaev ajo nuk ka dhënë rezultatet që priteshin.
“Filluam dhe tani jemi në fund të vitit, dhe ja, pranojmë se nuk i dha rezultatet e duhura. Ky është vetëm një reflektim i qeverisjes së ndershme të cilën kjo qeveri do vazhdojë ta praktikojë. Sepse ekzistojmë dhe punojmë për popullin gjithmonë është më e ndershme ta pranoni gabimin dhe të tërhiqeni një hap prapa, sesa të vazhdohet në diçka nga kapriçot dhe të tregoni se keni të drejtë në atë që e keni filluar si politikë”, ka deklaruar kryeministri Zaev.
Taksa progresive, aplikimi i së cilës nisi në fillim të janarit të këtij viti, synonte ndërtimin e një shoqërie korrekte dhe të drejtë për të gjithë. Zaev pati premtuar se në këtë taksë do të përfshiheshin vetëm personat më të pasur, përkatësisht 1% e qytetarëve të cilët do të taksoheshin me 8% shtesë për të ardhurat mbi 90 mijë denarë. Kjo do të thotë që personat që kishin pagë apo të ardhura mbi 1500 euro në muaj, përveç tatimit personal prej 10%, do të paguanin dhe tatimin shtesë progresiv prej 8%. Në total, ata do të paguanin 18% taksë.
Kjo bëri që shumë kompani, sidomos ato të fushës së teknologjisë dhe sektorëve të tjerë, të gjejnë mënyra të tjera për të paguar punonjësit e tyre.
Zaev thekson se me aplikimin e tatimit progresiv, bizneset janë transferuar në vendet fqinje. Sipas statistikave të qeverisë, në vend kanë hyrë 1 miliardë e 850 milionë denarë, por kanë dalë 2 miliardë e 400 milion denarë si rezultat i transferimit të bizneseve në vendet fqinje.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
