Policia e Tiranës ka njoftuar ndalimin e shtetasit Valter Bami, pas veprimeve hetimore të kryera për vrasjen e ndodhur në Krujë. Burime zyrtare bëjnë të ditur se 37-vjeçarit i janë marrë faktorë plotësues për hetim dhe deklarim rreth ngjarjes së ndodhur ku humbi jetën një person dhe u plagosën dy të tjerë. Pas deklarimeve, vëllai i Durim Bamit, personazhë të njohur për policinë, është lënë i lirë, për t’u shoqëruar sërisht këtë të enjte dhe për t’iu komunikuar masa e ndalimit. Njoftimi i policisë: Në vijim të veprimeve hetimore në lidhje me ngjarjen e datës 03.07.2023, ku në fshatin Larushkë, Krujë, në oborrin e banesës së shtetasit G. B., është qëlluar me armë zjarri e si pasojë ka humbur jetën shtetasi R. S. Rreth orës 04:00 të po kësaj date, është shoqëruar shtetasi V. B., 37 vjeç, të cilit i janë marrë faktorët plotësues dhe deklarim në lidhje me ngjarjen e mësipërme e më pas është lënë i lirë, ju informojmë se: Sot me datë 06.07.2023, bazuar në përgjigjen e aktit të ekspertimit kimik, ka rezultuar se në dorën e majtë të shtetasit V. B., janë konstatuar faktorë plotësues të qitjes me armë zjarri. Mbi bazën e këtij akti ekspertimi, Prokuroria pranë Gjykatës së Shkallës së Parë të Juridiksionit të Përgjithshëm Tiranë ka lëshuar sot më datë 06.07.2023, urdhrin e ndalimit për këtë shtetas për veprën penale "Mbajtja pa leje dhe prodhimi i armëve, armëve shpërthyese dhe i municionit", parashikuar nga neni 278 i Kodit Penal. Po sot, rreth orës 20:30, në fshatin Greps, Nikël, është lokalizuar, kapur dhe shoqëruar në ambientet e DVP Tiranë shtetasi V. B., 37 vjeç, banues në Nikël, Fushë Krujë. Ndërkohë vazhdojnë intensivisht hetimet për dokumentimin e plotë ligjor të ngjarjes së mësipërme. Kujtojmë se pak pas mesnatës së 4 Korrikut, nga breshëria e plumbave në shtëpinë e Gentian Bejtjes, mbeti i vrarë kunati i tij Ramazan Sino dhe u plagosën dy djemtë e mitur të Bejtjes, 10 dhe 13 vjeç. Objektiv i atentatit dyshohet se ishte Gentian Bejtja, i cili kishte ardhur para dy javësh në Shqipëri. Ky informacion siç duket ishte siguruar nga kundërshtarët e tij, që organizuan vrasjen. Në atentat dyshohet se morën pjesë 3 persona, të cilët lëviznin me makinë. Pasi lëshuan breshëri plumbash në drejtim të shtëpisë së Bejtjes, mjetin e dogjën rreth 6 kilometra larg. Më pas dyshohet se autorët u ndihmuan nga persona të tjerë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
