Miliarderi Jeff Bezos ka shitur shumë nga aksionet e tij në Amazon, duke e çuar vlerën totale të shitjeve në ditët e fundit në më shumë se 4 miliardë dollarë.
Gjigandi i teknologjisë, të cilin Bezos e themeloi në vitin 1994, tha se ka shitur 24 milionë aksione të Amazon këtë muaj.
Bezos, i cili është kryetari ekzekutiv i firmës, shiti për herë të fundit aksionet e Amazon në vitin 2021.
Në fillim të këtij muaji, kompania tha se ai po planifikonte të shiste 50 milionë aksione gjatë vitit të ardhshëm, të cilat kanë vlerë rreth 8.4 miliardë dollarë me çmimet aktuale.
Shitja e parë e 12 milionë aksioneve u njoftua në një dosje rregullatore të premten, e ndjekur nga një njoftim të martën për shitjen e 12 milionë aksioneve të tjera.
Bezos ka dhuruar gjithashtu aksione në Amazon si pjesë e filantropisë së tij, në vitin 2022.
Ndërsa Bezos u transferua në Miami në Florida nga Seattle në Uashington vitin e kaluar, ai do të kursejë rreth 280 milionë dollarë në taksë mbi aksionet me vlerë 4 miliardë dollarë që ka shitur.
Fitimet mbi 250.000 dollarë nga shitja e aksioneve ose investimeve të tjera afatgjata, tatohen me 7% në shtetin Uashington. Florida nuk ka taksa shtetërore mbi të ardhurat ose fitimet kapitale.
Megjithatë, ai do të jetë ende i detyruar ndaj taksave federale si rezultat i shitjes së aksioneve.
Kur Bezos njoftoi lëvizjen e tij në Florida, nxiti spekulime nëse kjo vinte për shkak të një faturë të mundshme tatimore me të cilën do të përballej në Uashington pasi shteti miratoi një taksë të re për shitjet e mëdha të aksioneve.
Shitjet e tij të aksioneve të Amazon vijnë pasi ato janë rritur me pothuajse 70% vitin e kaluar.
Bezos tha në nëntor se prindërit e tij ishin zhvendosur së fundmi në Miami, ku ai kaloi një pjesë të fëmijërisë së tij dhe se donte të ishte afër tyre dhe me projektin e tij hapësinor Blue Origin, i cili “po zhvendosej gjithnjë e më shumë në Kepin Canaveral”.
Bezos mbetet aksioneri më i madh i Amazon dhe është një nga njerëzit më të pasur në botë, me një pasuri të vlerësuar prej më shumë se 190 miliardë dollarë
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
