Gripi i shpendëve, Mersini: Rrezik i ulët për njerëzit, të rritet siguria në kapanonet e pularive (VIDEO)

Epidemiologu veterinar Kujtim Mersini, flet për praninë e gripit të shpendëve H5N5 në Shqipëri, duke qetësuar qytetarët se për konsumatorët rreziku është i ulët

Ai deklaroi për MCN Tv se nuk di të thotë një arsye specifike se pse u mohua prezenca e gripit të shpendëve në fillim, por shtoi se ngordhjet masive nuk vijnë nga gripi i shpendëve vetëm, por edhe nga sëmundje të tjera.

Konfirmimi erdhi dhe kësaj situate duhet ti bëjmë ballë. Ka prekur stabilimente të mëdha dhe ky është problem madhor, për sektorin e shpendarisë në Shqipëri. Të dy grupet e shpendëve janë rrezikuara, edhe të pularisë edhe ato shtëpiake. Ndaj duhet të rriten normat e sigurisë në stabilimente, pasi shpendët mbahen në disa kapanone. Tek kapanonet e paprekura duhet të rriten masat e sigurisë, në mënyrë që të mos përhapet sëmundja. Edhe tek shpendët e oborreve, janë 4 milionë shpendë që mbarështohen në oborre. Duhet të bëjnë kujdes, pasi mund të ketë përhapje në shkallë të gjerë. Sa i takon normave të biosigurisë, sugjerohet që të shmanget kontakti me shpendët e egër apo të sëmurë. Të merren masa për eliminimin e shpendëve të sëmurë.

I pyetur nëse gripi i shpendëve, përbën rrezik për shëndetin e konsumatorëve, Mersini tha se varianti që është izoluar është me përhapje të ulët në njerëz, krahasuar me gripet e tjera.

Epidemiologu kërkoi marrjen e masave të higjienës dhe gatime të mishit të shpendëve mbi 70 gradë, në mënyrë që të mos ketë rrezikshmëri për njerëzit.