Në lagjen numër 17 të qytetit pritet të nisë aksioni i paralajmëruar nga Bashkia Durrës për lirimin e hapësirave publike. Ndërsa është rrethuar perimetri, në terren gjenden efektivë të IMTV, të Policisë Bashkiake, punonjës të rendit. Ndërkohë, disa nga lokalet vijojnë punën për çmontimin dhe largimin e objekteve dhe materialeve.
Pas njoftimit nga Kryetarja e Bashkisë Durrës, Emiriana Sako, ditën e martë, për zhvillimin e një aksioni për lirimin e hapësirave publike fillimisht në lagjen numër 17, në lokalet në afërsi të Stacionit të Trenit dhe më pas në lagjen numër 11, në dy anët e rrugës, në afërsi të Mauzeleumit të Dëshmorëve, bizneset kanë nisur nga puna për heqjen e materialeve, vullnetarisht.
“Bizneset kanë kohë deri të premten për të liruar hapësirat publike!”- paralajmëroi nga mbledhja e këshillit bashkiak, Sako. Vetë subjektet kanë konfirmuar se i është bërë edhe njoftimi zyrtar përkatës.
Për këto dy sipërfaqe, që vite më parë kanë funksionuar si lulishte është hartuar projekti përkatës, që përfshin rikualifikimin e tyre dhe që në javët në vijim do të vihet në zbatim.
Kryebashkiakja Sako e ka cilësuar si tejet të rëndësishëm dhe të kërkuar nga qytetarët këtë aksion, duke shtuar se do të shtrihet edhe në hapësira të tjera, duke përmendur Shëtitoren e Plazhit apo dhe rrugët kryesore të qytetit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
