Ambasada e Shteteve të Bashkuara të Amerikës në Kosovë i dha sot mbështetje autoriteteve të Kosovës në vendimin për ndalimin e trenit serb që të hyjë në territorin e Kosovës. Përmes një deklarate, Ambasada amerikane thotë se Kosova ka të drejtë t’i kontrollojë kufijtë e vet.
“Kosova është një shtet sovran e i pavarur dhe ne e respektojmë të drejtën e Kosovës që ta kontrollojë se kush dhe çka kalon në kufijtë e saj. Jemi të lumtur që nuk pati konfrontime në kufi, por askush nuk përfiton nga rritja e nacionalizmit”, thuhet në deklaratë.
Por Ambasada u ka bërë thirrje palëve që t’i shmangin konfrontimet dhe të angazhohen në dialog.
Nga ana tjetër presidenti i Serbisë, Tomislav Nikoliç, është takuar me ambasadorin e Shteteve të Bashkuara, Kyle Scott, me të cilin ka folur rreth situatës së tensionuar që u krijua për shkak të trenit që u bllokua në veri të Kosovës.
Sipas mediave serbe, gjatë bisedës së tyre në pallatin presidencial, kreu i shtetit serb i ka komunikuar përfaqësuesit diplomatik të Uashingtonit se mbështetja pa kushte që Shtëpia e Bardhë ka treguar në drejtim të Prishtinës zyrtare përbën “një dëm të madh për qeverinë e Beogradit”
Megjithatë, Presidenti i Serbisë theksoi se shpreson që me administratën e ardhshme amerikane që do të kryesohet nga Donald Trump, do të ketë ndryshime drastike të situatës.
Ai lëshoi ndër të tjera akuza të ashpra për Kosovën, duke u shprehur se pala kosovare e priti me armatime një tren i cili nuk kishte për qëllim të provokonte askënd.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
