Opozita bojkoton seancën: Të anulohet votimi për teatrin (VIDEO)

Kuvendi mban sot seancën e radhës, ku do të diskutohet projektligji për magjistraturën.

Mësohet se deputetët e opozitës nuk do të marrin pjesë në seancë.

Megjithatë, të pranishëm në sallë janë dy krerët e grupeve parlamentare të PD-së dhe LSI-së, Edmond Spaho dhe Petrit Vasili, të cilët kanë kërkuar anulimin e votimit të ligjit për teatrin në seancën e kaluar, pasi sipas tyre procesi është falsifikuar. 

Kreu i grupit parlamentar të LSI-së, Petrit Vasili, tha se në seancën e së enjtes është manipuluar votimi i deputetit Vangjel Tavo.

“Është standard shumë i ulët, që u verifikua më në fund në sallën e parlamentit, ku vota u tjetërsua në mënyrën më të turpshme që mundet. Për ne është e papranueshme dhe e patolerueshme që në këtë situatë ne të vazhdojmë sikur nuk ka ndodhur asgjë. Dhe të jemi këtu dhe të ligjërojmë pikërisht për këtë gjë e cila ishte një emergjencë që duhet të verifikohej dhe nuk mund të hapej seanca. Pikërisht për këto arsye dhe kjo situatë e papranueshme bën që mos të vazhdojmë dot së bashku derisa kjo situatë të sqarohet dhe ky rivotim të kryhet”, tha Vasili.

Ndërsa kreu i grupit demokrat, Edmond Spaho, tha se opozita përveçse po privohet nga fjala e saj në Kuvend, po i merren edhe votat. “Një nga anëtarët e opozitës rezulton të ketë votuar pro shembjes. Nuk është çudi që në këtë vend të ndodhë diçka e tillë. Kërkesa jonë për të anuluar votimin është bërë para dy ditësh, pasi çështja është e rëndësishme. Ne si opozitë nuk do të marrin pjesë në seancën e sotme, pasi gjendje të tilla në Kuvendin e Shqipërisë po bëhen të zakonshme. Opozita po privohet nga e drejta e fjalës, por vullneti i saj po denatyrohet”, pohoi ai.

Ndërsa në emër të PS-së, kreu i grupit parlamentar, Taulant Balla, tha se vota e Tavos është regjistruar gabimisht. “Nga ana e PS-së nuk ka pasur asnjë deputet që të ketë votuar në emër të një deputeti tjetër. Sikurse për transparencë të opinionit publik, deputetit të pavarur në vendin që ai voton, i është dhënë një kartë. Kamerat e Kuvendit ta hetojnë. Nëse LSI ka detyrim për të bojkotuar, s’ka të bëjë me votimin. E drejta e Bitrit nuk mund t’i hiqet për të votuar. Çfarë dhe kush fshihet pas këtij skenari për të prishur votimin e ditës së enjte, këtë e kuptojnë të gjithë”, tha Balla.