Në mbledhjen e Këshillit të Ministrave të zhvilluar sot është miratuar një buxhet në masën 4 852 410 743 (katër miliardë e tetëqind e pesëdhjetë e dy milionë e katërqind e dhjetë mijë e shtatëqind e dyzet e tre) lekë, për rikonstruksionin ose riparimin e banesave private apo pallate, që nuk duhen rindërtuar nga e para. Kjo për ata individë të cilët përfitojnë nga grantet e rikonstruksionit të tërmetit të 26 nëntorit.
Ky fond, afër 5 miliardë lekë, do të jetë vetëm për pesë bashki: Durrësi, Tirana, Kruja, Lezha dhe Kavaja. Pjesën më të madhe do ta marrë Durrësi, që ishte edhe qyteti më i dëmtuar nga fatkeqësia natyrore.
Sipas vendimit të Këshillit të Ministrave për Durrësin do të jepen 3 miliardë e 220 milionë e 790 mijë e 743 lekë. Tirana do të marrë 703 milionë e 220 mijë, Lezha 249 milionë e 450 mijë, Kruja 660 milionë e 700 mijë, kurse Kavaja 18 milionë 250 mijë.
Vendimi i marrë ditën e sotme hyn në fuqi menjëherë dhe do të botohet edhe në fletoren zyrtare.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
