Cakaj përpara votimit të Këshillit Europian: Ka ardhur koha të hapen negociatat

Ministri në Detyrë për Europën dhe Punët e Jashtme Gent Cakaj, ka deklaruar sot se ka ardhur koha të hapen negociatat.

Pak para votimit të raportit të Këshillit Europian nga shtetet anëtare, për çeljen e negociatave për Shqipërinë, Ministri në Detyrë për Europën dhe Punët e Jashtme Gent Cakaj, ka reaguar duke u shprehur se, “Shqipëria ka përmbushur plotësisht të gjitha kushtet për të përparuar më tej në rrugën evropiane, ka luajtur një rol shumë konstruktiv në rajon dhe vazhdimisht ka qenë e palëkundur në lartësimin e vlerave evropiane”, shkruan Cakaj.

Ndër të tjera, Ministri në detyrë Cakaj është shprehur se pret që shtetet anëtare të vlerësojnë progresin e pamohueshëm të vendit tonë, duke vendosur hapjen e bisedimeve me Shqipërinë.

“Ka ardhur koha që bisedimet të hapen – kjo është thelbësore për të thelluar momentin e reformës dhe forcimin e Bashkimit Europian në Ballkanin Perëndimor”, përfundon ministri Caka.