Moti i keq, i shoqëruar me reshje bore, ka krijuar vështirësi në Veri të vendit, në zonat malore te qarkut Lezhë dhe Shkodër.
Vështirësi qarkullimi ka patur në segmentin Kallmet-Ungrenj, si dhe në zonën e Vermoshit dhe Lëpushës.
Reporteri Juli Simoni në një raportim për MCN Live bën me dije:
“Situata në qarkun e Lezhës ka nisur të përmirësohet. Në zonat malore të bashkisë Mirditë, Fan dhe Orosh dhe Selitë trashësia e borës ka arritur në 20 cm, duke krijuar vështirësi në qarkullimin e automjeteve. Përgjatë natës është punuar me mjetet e Bashkisë Mirditë për pastrimin e akseve rrugore dhe deri tani s’ka pasur problematika. Edhe në Rrugën e Kombit vijon lëvizja pa probleme. Intensiteti i erës ka rënë, kjo i ka dhënë mundësi punonjësve të OSHEE-së për rikthimin e energjisë elektrike, ku pjesa më e madhe e defekteve janë riparuar. Pjesa më e madhe e territorit s’ka probleme me furnizimin me energjinë elektrike".
Reporterja Bendis Druni në një raportim për MCN Live bën me dije:
“E diela në Shkodër është zgjuar me reshje bore që kanë pushtuar zonat malore. Flasim këtu për Qafë Thore-Theth që është një nga pikat turistike më të frekuentuara, ku ka patur reshje dëbore me intensitet mesatar. Ka pasur reshje deri në 5 cm në këtë zonë. Edhe Razma është përfshirë nga bora, por me intensitet të ulët, dhe s’ka paraqitur problematika. Problematika ka patur në zonën e Vermoshit dhe Lëpushës, pasi reshjet kanë qenë intensive, kanë nisur në orët e para të së shtunës. Ajo që e ka bërë problematike situatën është se kompanisë i është mbaruar kontrata dhe s’i është rinovuar. Për këtë arsye kompania është tërhequr dhe ka marrë makineritë me vete".
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
