BE: Vendet perëndimore nuk do të dërgojnë ushtarët e tyre për të luftuar në emër të Ukrainës

Vendet perëndimore nuk do të dërgojnë ushtarët e tyre për të luftuar Rusinë në emër të Ukrainës, tha të mërkurën Drejtori i Përgjithshëm i Shtabit Ushtarak të Bashkimit Evropian, zëvendësadmirali Herve Blejean. “Të dërgosh trupa tokësore në Ukrainë do të thotë të jesh palë në luftë, të jesh në luftë me Rusinë dhe askush nuk e dëshiron këtë, as BE-ja, as NATO-ja”, tha Blejean për kanalin televiziv francez LCI . “Ne nuk jemi në luftë me Rusinë. Ne po mbështesim një vend të sulmuar nga Rusia.” Blejean shtoi se ofensiva e vazhdueshme ukrainase “nuk do të ishte fundi i luftës, pavarësisht nga rezultatet e saj”. Vërejtjet e admiralit francez erdhën pasi ish-sekretari i përgjithshëm i NATO-s Anders Fogh Rasmussen sugjeroi që anëtarët individualë, si Polonia dhe shtetet baltike, mund të vendosin përfundimisht të dërgojnë ushtarë në Ukrainë.