Ylli i Reality TV, Kim Kardashian dhe legjenda e boksit Floyd Mayweather Jr. po përballen me një padi që pretendon se të famshmit mashtruan investitorët në promovimin e tyre të një kriptomonedhe.
Padia, e paraqitur më 7 janar në gjykatën federale të Los Anxhelosit, pretendon se të famshmit reklamuan kriptomonedhat e shitura nga EthereumMax, ose EMAX, në mënyrë që të rrisin çmimin e tij dhe të fitojnë "në kurriz të ndjekësve dhe investitorëve".
"Drejtuesit e kompanisë, duke bashkëpunuar me disa promovues të famshëm... bënë deklarata të rreme ose mashtruese në lidhje me EthereumMax përmes reklamave në mediat sociale dhe aktiviteteve të tjera promovuese," thuhej në padi.
Sipas padisë, Kardashian promovoi EthereumMax në një postim të qershorit 2021 në Instagram, kur ajo kishte 250 milionë ndjekës.
"A jeni të interesuar në kripto?" ajo shkroi në postim, e ndjekur nga mohimi "kjo nuk është këshillë financiare". Ajo përfshiu hashtagun #AD për të treguar se postimi ishte një reklamë me pagesë, thuhej në padi.
Mayweather promovoi EthereumMax në mbathjet e tij të boksit gjatë një ndeshje të shikuar gjerësisht me yllin e YouTube, Logan Paul, në qershor.
Padia, e ngritur nga një banor i Nju Jorkut, i cili bleu EMAX dhe humbi para, propozohet si një padi për këdo që bleu EMAX nga mesi i majit deri në fund të qershorit 2021.
Çështja kërkon kthimin dhe heqjen e fitimeve nga të pandehurit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
