Xhamajka konfirmon zyrtarisht se nuk e ka njohur pavarësinë e Kosovës.
Në një përgjigje për Klan Kosovën, Ministria e Punëve të Jashtme dhe e Tregtisë së Jashtme e Xhamajkës, ka sqaruar se njohja e pavarësisë është në shqyrtim, por deri tani nuk ka pasur asnjë vendim.
“Ministria e Punëve të Jashtme dhe e Tregtisë së Jashtme e Xhamajkës është në dijeni për raportimet publike rreth njohjes së Kosovës si shtet i pavarur”, shprehet në njoftim Njësia për Marrëdhënie me Publikun dhe Çështje Mediale e MPJTJ-së së Xhamajkës.
“Çështjet si këto janë në shqyrtim të vazhdueshëm nga Qeveria e Xhamajkës. Megjithatë, tani për tani, Xhamajka nuk ka marrë asnjë vendim rreth çështjes”, thekson komunikata, në të cilën shprehet keqardhja e Xhamajkës si shtet për krijimin e një keqkuptimi të tillë.
Rasti në fjalë u bë kryetitull i të gjitha mediave të Kosovës gjatë kësaj jave që po mbyllet. Gjithçka nisi nga një raportim i presidentit Hashim Thaçi në rrjetet sociale për njohjen e Kosovës si shtet i pavarur nga Xhamajka.
Thaçi i referohej raportimit të ambasadores së Kosovës në SHBA, Vlora Çitaku, por kjo u pasua nga mohimi i Xhamajkës, çka hapi një debat tjetër në gjirin e politikës së Kosovës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
