Vettingu shkon në Venecia, përgjigja brenda dhjetorit

Dosja e Vettingut, pritet t’i përcillet të premten Komisionit të Venecias.

Burime zyrtare nga kjo gjykatë pohojnë se dosja me argument përse kërkohet opinioni i këtij komisionin, vendimin e arsyetuar dhe të detajuar përse u vendos pezullimi ligjit dhe argumentet e secilës palë, po përkthehet në anglisht dhe të premten mund të niset zyrtarisht drejt Komisionit të Venecias.

Në dosje përfshihet gjithashtu varianti në anglisht i ligjit të Vettingut i miratuar në 30 shtator dhe kushtetutës të vëna në dispozicion nga Euralius.

Se kur strukturës europiane që asiston në hartimin e ligjeve, do t’i kërkohet opinioni për ligjin bazë të reformës në drejtësi, Kryetari i Gjykatës Kushtetuese Bashkim Dedja tha për Report Tv se “sa më shpejt të jetë e mundur. Po përkthehen të gjithë materialet që do shkojnë në Venecia, nuk është vetëm ligji pjesë e dosjes“.

“Unë aktualisht nuk jam në Shqipëri por i gjithë materiali po bëhet gati për t’u dërguar atje” tha ai.

Ligji i Vettingut u rrëzua nga Gjykata Kushtetuese me arsyetimin se do të dërgohet në Venecia për opinion.

Ndërsa Komisioni i Venecias u shpreh për Vizion plus së përgjigja për opinionin për ligjin e Vettingut do të jepet brenda muajit dhjetor.

“Komisioni i Venecias nuk është njohur ende zyrtarisht me kërkesën e Gjykatës Kushtetuese, por e kemi mësuar këtë nga media. Me shumë mundësi ne do të miratojmë opinionin tonë mbi këtë Amicus Curiae gjatë sesionit të 9 dhe 10 Dhjetorit të këtij viti”.