Dyshime për korrupsion, SHBA vendos sanksione ndaj ndihmësit kryesor të Orban

Akuzat për korrupsion dhe miqësi e kanë ndjekur kryeministrin Viktor Orban që kur erdhi në pushtet në vitin 2010, ndërsa marrëdhëniet e Budapestit me Uashingtonin janë bërë gjithnjë e më të tensionuara gjatë presidencës së Joe Biden, kryesisht për shkak të lidhjeve të ngushta të Hungarisë me Rusinë.

Nga ana e tij Orban ka mohuar vazhdimisht akuzat për korrupsion.

Sanksionet synojnë Antal Rogan, një nga ndihmësit kryesor të Orban, i cili ka drejtuar zyrën e tij të kabinetit që nga viti 2015.

Rogan ka qenë pranë Orban për dekada, duke drejtuar makinerinë mediatike të qeverisë së tij dhe duke ndihmuar në orkestrimin e fushatave të tij zgjedhore. Aktualisht ai mbikëqyr edhe shërbimet sekrete të Hungarisë, një vend anëtar në NATO.

Thesari i SHBA-së e akuzon Rogan për përdorimin e rolit të tij për të siguruar përfitime financiare për veten dhe aleatët e tij politikë.

“Personat e lidhur ngushtë me partinë politike në pushtet kanë fituar perandori masive pronash. Antal Rogan është arkitekti, zbatuesi dhe përfituesi kryesor i këtij sistemi korrupsioni”, tha ambasadori i SHBA në Hungari David Pressman në një konferencë për mediat.

Pressman ka qenë një kritik i hapur i qeverisë së Orban gjatë kohës së tij në Budapest, duke e kritikuar atë për forcimin e lidhjeve me Rusinë.

Zyra e kabinetit të Orban, të cilën Rogan e drejton, e quajti masën si “hakmarrjen e fundit, të vogël të ambasadorit amerikan në largim, të pasuksesshëm”.

Orban dhe partia e tij Fidesz kanë qenë ndër mbështetësit më të zëshëm të Trump në Evropë. Trump kthehet në Shtëpinë e Bardhë më 20 janar.