Popullsia japoneze shumë e vjetër, profesori i Yale University sugjeron vetëvrasjen

Nëse shoqëria plaket shumë, zgjidhja mund të jetë vetëvrasja. Është kjo ideja e një profesori të Yale University mbi Japoninë, dhënë për New York Times, duke qenë se shteti duhet të merret me banorët gjithnjë e më të moshuar, me rritjen e kostove shëndetësore dhe të sigurimeve shoqërore, si dhe me të gjithë problemet e tjera.

Vëzhgimet vijnë nga profesor Yusuke Narita, me origjinë japoneze, i cili për shkak të përhapjes së deklaratave të tij po mundohet të korrigjojë atë që ka thënë.

Por fjalët e forta mbeten! Shoqëria japoneze është e vetëdijshme për ritualin e vetëvrasjes i cili quhet “seppuku”, i njohur gjithashtu si “harakiri”, gjë që i lejohej në kohët e lashta samurait, një plagë vdekjeprurëse që praktikohet duke shpuar dhe prerë barkun tejpërtej, zonë që konsiderohet si selia e shpirtit.

Një popullsi në plakje mund të çojë në rënie të produktivitetit dhe të zgjerimit ekonomik me kalimin e kohës. Sipas të dhënave më të fundit për vitin 2020, njerëzit mbi 65 vjeç në Japoni po shtohen vazhdimisht, duke arritur pothuajse 30% të totalit të banorëve.

Madje, profesori japonez-amerikan foli për mundësinë që në të ardhmen të bëhet e detyrueshme vetëvrasja e të moshuarve. Kësisoj debati që ka lindur, si në SHBA, por mbi të gjitha në Japoni, është shumë i ndezur.

Dhe prek një çështje të hapur, jo vetëm për vendin aziatik, por edhe për të gjithë botën, duke qenë se diskutimet për shoqërinë, për produktivitetin e njerëzve dhe për të drejtat, janë një temë që prekin gjerësisht.

Në Japoni, problemi i popullsisë gjithnjë e më të moshuar është në qendër të vëmendjes politike, duke qenë se mbi të gjitha kostot e ndërlidhura do të rrezikonin brenda pak vitesh, stabilitetin e vetë sistemit, me gjithnjë e më pak punëtorë dhe gjithnjë e më shumë pensionistë, që ndoshta me kalimin e viteve mund të kenë nevojë për trajtim dhe ndihmë.