Varikoçela në testikuj/ Urologia Ndervataj: Një nga shkaqet më të shpeshta të infertilitetit mashkullor

Varikoçela është një nga shkaqet më të shpeshta të infertilitetit mashkullor dhe ndodh kur venat që furnizojnë testikujt nuk funksionojnë siç duhet. 

Për shikuesit e programit të mwngjesit “Zgjohu me MCN”, dr. Drilona Ndevataj, specialist në urologji dhe andrologji që vepron në Itali, rreth 20% e meshkujve preken nga varikoçela, dhe kjo mund të identifikohet shpesh në moshën 14-20 vjeç.

Varikoçela është një zgjerim i venave brenda qeses së lëkurës që mban testikujt. Në rreth 90% të rasteve, ajo ndodh në testikun e majtë, për shkak të presionit më të madh dhe rrjedhjes më të ngadaltë të gjakut në atë anë.

Varikoçela prek kryesisht meshkujt e rinj, zakonisht ata që janë në moshën 15-20 vjeçare, dhe është e pranishme në rreth 20% të popullsisë. Disa prej tyre mund të mos kenë simptoma në fillim, por me kalimin e kohës, mund të ndiejnë ënjtje dhe dhimbje në testikuj për shkak të progresit të zgjerimit të venave.

Në fazat e hershme, pacientët shpesh vërejnë vetëm ndjesi të padëshiruara, si pesha ose shqetësimi në testikuj. Në fazat më të avancuara, mund të ndodhi një ndryshim në madhësinë e testikut, duke u dalluar nga tjetri.

Sipas urologes Ndervataj, diagnoza e varikoçelës bëhet kryesisht nga urologu, i cili mund të kërkojë analiza të spermës për të kontrolluar cilësinë e saj. 

Ajo thekson se operimi është një opsion i mundshëm dhe efektiv për të trajtuar këtë gjendje, dhe mund të sjellë përmirësime të dukshme në cilësinë e spermës dhe mundësitë për fertilitet.

Në disa raste, diagnoza bëhet nga mjeku i sportit ose mjeku i përgjithshëm, për shkak të shqetësimeve të pacientit.

Nëse spermograma është normale, nuk është gjithmonë e nevojshme të ndërmerren masa. Megjithatë, nëse ka përkeqësim të cilësisë së spermës, një operacion mund të jetë i nevojshëm. 

Operimi është një procedurë e efektshme dhe mund të përmirësojë cilësinë e spermës, duke rritur mundësitë për fertilitet. 

Pas operacionit, periudha e pritjes për rritjen e numrit të spermatozoidëve është zakonisht 3-6 muaj.

Duke trajtuar varikoçelën, mund të përmirësohet cilësia e spermës dhe fertiliteti. Është vërtetuar se rreth 40-50% e meshkujve që kanë probleme me fertilitetin, kanë prezencë të varikoçelës, e cila është një faktor kryesor që ndikon në fertilitet.