Zbardhen detaje mbi marrëveshjen 10-vjeçare për sigurinë Shqipëri-Ukrainë 

Media “The Kyiv Independent” zbardhi detaje mbi marrëveshjen 10-vjeçare për sigurinë, të nënshkruar nga kryeministri Edi Rama dhe Presidenti Volodymyr Zelensky, në margjinat e Forumit Ekonomik Botëror në Davos të Zvicrës më 21 janar.

Marrëveshja e gjerë përfshin bashkëpunimin midis dy vendeve në fusha duke përfshirë mbrojtjen, shkëmbimin e inteligjencës, sigurinë kibernetike, sigurinë bërthamore, si dhe mbështetjen e ndërsjellë për anëtarësimin e njëri-tjetrit në Bashkimin Evropian.

“Shqipëria rikonfirmon mbështetjen e saj të palëkundur për pavarësinë, sovranitetin dhe integritetin territorial të Ukrainës brenda kufijve të saj të njohur ndërkombëtarisht që nga viti 1991”, thuhet në marrëveshje, duke shtuar se dokumenti nuk “zëvendëson anëtarësimin e ardhshëm të Ukrainës në NATO”.

"Shqipëria ka ofruar ndihmë ushtarake dhe humanitare për Ukrainën që nga fillimi i pushtimit në shkallë të plotë dhe do të vazhdojë mbështetjen e saj gjatë gjithë afatit dhjetëvjeçar të marrëveshjes," shkroi Zelensky në X. "I jam mirënjohës Shqipërisë për mbështetjen rrugën tonë të integrimit evropian, duke forcuar pozicionet tona në fushën e betejës dhe duke na sjellë më pranë një paqeje të qëndrueshme për Ukrainën”, shton ai. 

Ndërsa mbështetja ushtarake e Shqipërisë për Ukrainën vazhdon, marrëveshja thekson se Shqipëria "do të vazhdojë të mbështesë Ukrainën në të njëjtën mënyrë si në 2022-2024", raporton media në fjalë.  Marrëveshja gjithashtu angazhoi Shqipërinë në pjesëmarrjen e saj në koalicionin e avionëve luftarakë, një nismë që ndihmon Ukrainën të marrë avionë luftarakë F-16 të prodhuar nga SHBA dhe trajnimin e nevojshëm.

“Shqipëria do të japë kontributin e saj në koalicionin e avionëve luftarakë duke ofruar trajnime në gjuhën angleze për pilotët dhe teknikët ukrainas”, thuhet në marrëveshje.

Shqipëria, një anëtare e NATO-s, nënshkroi më parë një marrëveshje të përbashkët bashkëpunimi me Ukrainën në shkurt 2024. Pak ditë më parë, më 19 janar, Tirana hapi ambasadën e saj të parë në Ukrainë, duke krijuar misionin e parë të përhershëm diplomatik të vendit në Kiev që kur të dy vendet hynë në marrëdhënie diplomatike në 1993.