Një vit nga masakra në Bucha, Zelensky: Do dënojmë çdo autor, s’do të falim kurrë

Ukraina do të "dënojë çdo autor" për mizoritë e kryera në Bucha, tha të premten Presidenti Volodymyr Zelensky.

“Bucha dhe rrethi Bucha. 33 ditë okupim. Më shumë se 1,400 vdekje, përfshirë 37 fëmijë. Më shumë se 175 njerëz u gjetën në varreza masive dhe dhoma torture. 9000 krime lufte ruse. 365 ditë që kur është një qytet i lirë ukrainas edhe një herë. Simbol i mizorive të ushtrisë së vendit pushtues. Nuk do të falim kurrë. Ne do të ndëshkojmë çdo autor”, tha Zelensky në një postim në Telegram.

Prokurori i Përgjithshëm ukrainas Andrii Kostin tha se këto ishin "shifra të tmerrshme" në një deklaratë të veçantë të premten.

"Kjo ishte hera e parë që ne të gjithë pamë prova të shkallës së paprecedentë të mizorive të armikut," tha ai.

Zyra e prokurorit ka njoftuar pothuajse 100 oficerë ushtarakë rusë për dyshimin për kryerjen e krimeve të luftës në Bucha, me aktakuza kundër 35 tashmë të dërguara në gjykatë, sipas deklaratës.

“Ne nuk do të ndalemi derisa të dënohen të gjithë organizatorët dhe autorët e krimeve të luftës”, tha Kostiin në deklaratë.

Kryediplomati i Bashkimit Evropian, Josep Borrell, gjithashtu shënoi përvjetorin në një postim në Twitter.

"Ka kaluar një vit që kur u zbuluan krimet e luftës të kryera nga trupat ruse në #Bucha. Unë mbaj me vete imazhet e tmerrshme. BE ndihmon Ukrainën për të hetuar krime të tilla dhe për të mbledhur prova. Nuk do të ketë mosndëshkim”, tha ai.