Në kërkim si organizator i kultivimit të kanabisit në Krujë, ekstradohet nga Italia

Një person i akuzuar organizatori i kultivimit të bimëve narkotike në Krujë, është ekstraduar nga Italia drejt vendit tonë.

I ekstraduari është E. G., 33 vjeç, të lindur në Krujë.

Gjykata e Rrethit Gjyqësor Krujë, në vitin 2023, e ka dënuar këtë shtetas, me 4 vjet burgim, për veprën penale “Kultivimi i bimëve narkotike”. Nga dënimi, 33-vjeçarit i ka mbetur për të vuajtur rreth 1 vit burgim.

Në vitin 2021, shtetasi E. G., në rolin e organizatorit, ka bashkëpunuar me tre persona, për të përgatitur një sipërfaqe toke pronë publike në fshatin Krastë, Krujë, për kultivim të bimëve narkotike. 

Si rezultat i ndërhyrjes së policisë, tentativa për këtë rast kultivimi u parandalua që në fazë fillestare. 

Më tej, gjatë kontrolleve në banesat e të implikuarve në këtë rast, policia gjeti 240 fidanë kanabisi, një armë zjarri me municion dhe mjete që i shërbenin kultivimit të bimëve narkotike.