Një marrëveshje dypalëshe është nënshkruar në Gjermani mes kreut të Policisë së Shtetit, Gledis Nano, dhe presidentit të Policisë Federale Gjermane, dr. Dieter Romann.
Marrëveshja e bashkëpunimit vjen në kuadër të projektit ndërkombëtar “SCOPE”. Ky projekt ka në fokus luftën ndaj grupeve të organizuara kriminale që i pajisin emigrantët e parregullt me dokumente të pavlefshme dhe u paraqesin atyre mënyra për të kaluar kufirin, duke shmangur pikat e kontrollit kufitar, si dhe luftën ndaj grupeve të organizuara kriminale, të cilët përmes kësaj veprimtarie, rrezikojnë jetën e këtyre subjekteve.
Gjatë takimit me homologun gjerman, Nano tha se policia shqiptare ka të gjitha kapacitetet profesionale dhe njerëzore për të qenë në krah dhe e barabartë me policitë partnere.
“Mbështetja juaj dhe e policisë gjermane është një motiv më shumë për mua, për të përmbushur prioritetet, shumica e të cilëve janë të përbashkëta, pasi kanë të njëjtin qëllim, krijimin e një ambienti të sigurtë për jetën dhe pronën e qytetarëve tanë”, u shpreh Nano.
Presidenti i Policisë Federale Gjermane, Dr. Dieter Romann vlerësoi rezultatet e arritura nga Policia shqiptare në luftën kundër kriminalitetit, duke theksuar se kjo është një luftë nacionale dhe ndërkombëtare.
Në kuadër të profesionalizmit, policia gjermane theksoi se është e nevojshme që në vijim të bashkëpunimit midis dy policive, të ketë akoma më shumë skuadra hetimore të përbashkëta, shkëmbime informacioni në kohë reale dhe operacione të përbashkëta kundër grupeve kriminale.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
