Gjykata e Beratit ka pezulluar nga detyra drejtorin e burgut, Hiqmet Këlliçi.
Gjykata e Beratit pranoi kërkesën e Prokurorisë për Hiqmet Këlliçin i cili akuzohet “për kryerjen e veprimeve arbitrare”.
Hiqmet Këlliçi akuzohet për “Kryerje të Veprimeve Arbitrare” ndaj një të burgosuri që vuante dënimin në IEPV Berat,vepër penale që parashikohet nga Neni 250 i Kodit të Proçedurës Penale. Kallzimi penal ndaj Këlliçit është bërë nga avokati i të burgosurit në 16 Janar 2020.
Në kallzimin penal thuhet se,Këlliçi e ka izoluar të burgosurin Krios Vangjeli nga 13-20 Janar 2020 dhe e ka mbajtur në dhomën e izolimit me pranga,duke e lënë edhe më tej afateve që e lejon ligji. Në kallzimin penal ndaj Hiqmet Këlliçit,ndër të tjera thuhet se,me urdhër të drejtorit punonjësit e burgut e kanë trajtuar këtë të burgosur në mënyrë çnjerrëzore.
I burgosuri Krios Vangjeli mësohet se është transferuar me urdhër të Këlliçit në fillim të këtij muaji në Repartin e Posaçëm të Burgut të Fierit. Këlliçi e ka apeluar masën ndaluese në Gjykatën e Apelit Vlorë,ndërkohë që e ka lënë detyrës dhe është larguar prej ambjenteve të Burgut të Beratit pasditen e së Enjtes,menjëherë pasi Gjykata e Beratit urdhëroi pezullimin e tij nga detyra.
Në ngarkim të drejtorit të IEPV Berat janë të regjistruara deri më tani në Prokurorinë e Rrethit të Beratit edhe 3 kallzime të tjera penale për “shpërdorim detyre”. Dy kallzime penale janë bërë nga SHÇKB e Burgjeve që e akuzon se favorizonte të dënuarit për “liri me kusht” në këmbim të rryshfeteve dhe një tjetër kallzim penal për “Shpërdorim Detyre” është bërë nga disa avokatë të Beratit,që e akuzojnë se ka shkelur të drejtat e avokatëve,duke mos i lejuar për takimet me të paraburgosurit e mbrojtur prej tyre.
Gjykata ka dhënë masën e pezullimit nga puna deri në përfundim të hetimeve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
