Shtetet e Bashkuara kanë kërkuar forcimin e koordinimit ndërkombëtar për goditjen e rrjeteve të trafikut të drogës. E ngarkuara me punë e SHBA-së në Shqipëri, Nancy VanHorn, u bëri thirrje organeve ligjzbatuese shqiptare që të tregohen vigjilente ndaj trafikut të drogave të reja sintetike.
Lidhur me këtë çështje, gazetari Ferdinand Dervishi, në një analizë për edicionin e lajmeve në MCN TV, u shpreh se ligji dhe institucionet duhet të jenë gjithmonë një hap përpara krimit të organizuar.
Jo vetëm për krimin e organizuar shqiptar, por në përgjithësi shteti dhe organet ligjzbatuese duhet të synojnë të jenë një hap përpara krimit.
Megjithatë, kjo është e vështirë, sepse krimi fillimisht realizon veprën, trafikun apo aktivitetin kriminal dhe më pas hyjnë në lojë policia dhe hetimi.
Ai theksoi se parandalimi mbetet elementi më i rëndësishëm në luftën kundër kriminalitetit, ndërsa shtoi se SHBA e sheh trafikun e drogës si një çështje me interes të drejtpërdrejtë kombëtar.
Shtetet e Bashkuara nuk e shohin këtë problem vetëm nga këndvështrimi ynë lokal.
Ata janë të shqetësuar për faktin se grupe kriminale shqiptare mund të trafikojnë drogë edhe në territorin amerikan.
Pikërisht këtu lidhet interesi i tyre për të ushtruar presion dhe për të kërkuar bashkëpunim më serioz nga policia shqiptare dhe institucionet e tjera.
Bashkëpunimi ndërkombëtar dhe rritja e kapaciteteve parandaluese janë thelbësore për të luftuar rrjetet kriminale që operojnë përtej kufijve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
